АЭХА раҳбари: Эрон ядровий дастурини ҳарбий ҳаракатлар билан ҳал қилиб бўлмайди

Атом энергияси бўйича халқаро агентлик (АЭХА) раҳбари Рафаэл Мариано Гросси Эрон ядровий дастури муаммосини ҳарбий зарбалар билан ҳал қилиб бўлмаслигини айтди.

У CBS телеканалининг Face the Nation дастурида Эрондаги ядро иншоотлари билан боғлиқ вазиятга баҳо берди.

АҚШ ва Исроилнинг ҳужумлари натижасида Эрондаги ядровий иншоотлар жиддий зарар кўрганини билдирган Гросси, Эрон расмийлари объектларни кўздан кечирганидан сўнг зарарнинг тўлиқ ҳажмини аниқ билишини қўшимча қилди.

Унинг сўзларига кўра, АЭХА қайсидир нуқтада Эрон ядровий иншоотлари бўйича эҳтимолий келишувда иштирок этиши керак бўлади. Бош директор агентлик инспекторларини объектларга қайтариш ва уларнинг фаолиятини давом эттириш муҳимлигига эътибор қаратди.

Эрон Конституция муҳофизлари кенгашининг АЭХА билан ҳамкорликни тўхтатиб туриш тўғрисидаги қонунни маъқуллаганига тўхталиб, Гросси бу содир бўлмаслигига умид билдирди, Эрон Ядро қуролини тарқатмаслик тўғрисидаги шартнома (ЯҚТШ) иштирокчиси сифатида агентлик билан ҳамкорлик қилишга мажбур.

Эрон ҳозирда АЭХА инспекторларини «эътиборсиз қолдиряптими» деган саволга жавоб берар экан, агентлик раҳбари шундай деди:

«Бу маънода, йўқ. Мен қабул қилинган резолюцияга эҳтиёткорлик ва хавотир билан амал қиляпман, лекин, албатта, бу уларнинг қонуни. Бу уларнинг парламенти, аммо ҳуқуқий оқибатлар бор. Албатта, халқаро шартнома устувор. Ички қонунларга асосланиб халқаро шартномадан қочиб қутула олмайсиз, лекин Эрон буни ҳозир айтмаяпти, менимча, бу конструктив ва шунинг учун бошқасига батафсил тўхталиб ўтишга ҳожат йўқ, деб ўйлайман». 

Тахминан 400 килограмм бойитилган уран ҳужумлардан олдин кўчирилганми ёки йўқми, деган саволга Гросси бу материал сўнгги 12 кун давомида у ерда бўлган-бўлмаганини аниқ билмаслигини айтди.