ФИФА президенти Шавкат Мирзиёевга мактуб йўллади

Жанни Инфантино Ўзбекистон ўз тарихида илк бор ФИФА Жаҳон чемпионатига чиққани билан президент ҳамда бутун ўзбекистонликларни табриклади.

Фото: Президент матбуот хизмати

Футбол ассоциациялари халқаро федерацияси (ФИФА) раҳбари Жанни Инфантино Ўзбекистон президенти Шавкат Мирзиёевга мактуб йўллади.

«Жаноби Олийлари,

Ҳурматли Президент!

Кеча Ўзбекистон ўз тарихида илк бор ФИФА Жаҳон чемпионатига чиқиб, Осиёда биринчи бўлиб ЖЧ-2026 йўлланмасини қўлга киритган терма жамоалардан бирига айланди.

Бутун футбол жамоатчилиги номидан Сизни ва бутун Ўзбекистон халқини ушбу муносиб ва тарихий натижа билан табриклашга ижозат бергайсиз.

Бундай ажойиб ютуқ ушбу муваффақиятга алоқадор бўлган барчанинг биргаликдаги саъй-ҳаракатлари ва қатъий иродаси туфайли амалга ошди. Сизга, ҳукуматингизга, Ўзбекистон футбол ассоциациясига, футболчиларга, мураббийга, барча ходим ва раҳбарларга, шунингдек, албатта, қалби қайноқ мухлисларга самимий табрикларимни йўллайман.

Муҳтарам Президент, Сизга 2026 йилги ФИФА Жаҳон чемпионатида муваффақиятлар тилайман ҳамда Сиз, Жаноби Олийлари билан яна бир бор учрашиш имкониятини интиқлик билан кутаман».

Ўзбекистон миллий жамоаси 5 июн куни Жаҳон чемпионати саралаши 9-турида БАА билан 0:0 ҳисобида дуранг ўйнаб, мундиал йўлланмасига эга чиқди. Бу Ўзбекистон тарихидаги илк жаҳон чемпионати бўлади. Шу куннинг ўзида Шавкат Мирзиёев футбол бўйича Ўзбекистон миллий жамоаси бош мураббийи Тимур Кападзега қўнғироқ қилиб, ўз тарихида илк бор Жаҳон чемпионати йўлланмасини қўлга киритган футболчиларга табрик йўллади. Шунингдек, ФИФА президенти Жанни Инфантино ҳам ўзбекистонлик футболчиларни табриклади.

Тайёрлаган: Азиз Қаршиев

#Жанни Инфантино #ЖЧ-2026 #Шавкат Мирзиёев