Вилоят кенгаши депутати сайёҳларга қулай бўлиши учун Самарқандда «долларфуруш»ларга лицензия беришни таклиф этди

Депутатнинг сўзларига кўра, Самарқанд шаҳрига келаётган чет эллик сайёҳлар валюта алмаштиришда ошиқча овора бўлмаслиги учун, вилоят ҳудудида «қора бозор»да фаолият олиб бораётган «долларфуруш»ларга қонуний лицензия бериш керак.

«Бугун валюта алмаштириш масаласида «қора бозор» йўқ, деб айтиб бўлмайди. Ҳанузгача кўп жойларда улар ишлаяпти. «Валютчик»ларга лицензия бериб хусусий валюта айирбошлаш шохобчаларини очиб ишлашига имконият берилса улар «соядан қуёш нури остига ўтади». Кейин уларнинг ҳисобот бериши ҳам осон бўлади. Кечалари улар ўзи ишлайди, кейин рақобат катта бўлади. Туристик марказда, туристик шаҳарда туристлар кечаси валюта айирбошлашда меҳмонхона қидириб юрмайдида, бориб валюта алмаштириш жойларида бемалол айирбошлайверади», деган Аҳроров.

Kun.uz мухбири вилоятда фаолият олиб бораётган банкларнинг бир нечтаси билан мижоз сифатида боғланиб, валюта олди-сотдиси қай вақтда амалга оширилиши билан қизиқди. Банкларнинг баъзиси валюта олди-сотдиси 16:00 да тўхтатилишини, баъзилари фақат сотиш 16:00 дан тўхтатилиб, сотиб олиш 18:00 гача давом этишини маълум қилди. Демак, тижорат банкларининг аксарияти сутка давомида бор йўғи 6-8 соат мобайнида валюта олди-сотдиси билан шуғулланади.