Японияда 36 кишининг ўлимига сабаб бўлган жиноятчи ўз айбини тан олди   

Япониянинг Kyoto Animation студиясида ёнғин уюштирган жиноятчи айбини тан олувчи кўрсатмалар бера бошлади.  

Ёнғинни содир этган 41 ёшли Синдзи Аоба ўз айбини тўлиқ тан олган ва мақсади айнан студия ходимларини нишонга олиш бўлганини таъкидлаб ўтган. 

“Менга ўлим жазоси берилиши муқаррар”, деб айтган айбланувчи. Унинг таъкидлашича, у ёнғинни содир этиш учун студиянинг 1-филиалини у ерда энг кўп сонда одам ишлагани учун танлаган.

Жорий июлда айбланувчи Kyoto Animation аниме студияси биносига “Ҳамманг йўқ бўлларинг” деб ҳайқирганча бостириб кириб, полга бензин қуйиб, бинога ўт қўйган. У бир неча дақиқадан кейин полиция томонидан ушланган. У қўлга олиниши вақтида студия ундан “новелла ўғирлагани”ни айтишга улгурган. Айбланувчининг ўзи ҳам кўплаб куйиш жароҳатлари олгани сабабли полиция уни сўроқ қилиш учун унинг тикланиб олишини кутишига тўғри келган.

Ёнғин оқибатида 700 квадрат метр майдонга эга 3 қаватли бино буткул ёниб кул бўлган, 36 киши ҳалок бўлган, 33 киши жароҳат олган.

Студия раҳбарияти фожиага қарамай, ўз ишини давом эттираётганини айтган. Япония ҳукумати ўз навбатида компанияга, ҳалок бўлганлар оилалари ва жабрланувчиларга молиявий ёрдам кўрсатишга ваъда берган.