Жиззахда туғуруқхонадан чақалоқ ўғирлаб кетилди

Юзига тиббий ниқоб таққан аёл болани онасининг олдидан шифокорга кўрсатиш баҳонаси билан олиб чиқиб кетган. У шу куннинг ўзида ушланган.

Жорий йилнинг 28 январ куни Республика ихтисослаштирилган она ва бола саломатлиги илмий-амалий маркази Жиззах филиалида зафарободлик 28 ёшли аёл икки ўғил фарзандни дунёга келтирган.

31 январ куни тахминан 19:30 ларда 25-30 ёшлардаги юзига тиббий ниқоб таққан аёл онанинг хонасига кирган ва “болангизни шифокор кўригига олиб бораман, қорни дам экан” дея чақалоқлардан бирини олиб чиқиб кетган ва кейин қайтиб келмаган.

Вилоят ИИБнинг маълум қилишича, чақалоқ шу куннинг ўзида топилган. Уни ўғирлаб кетган шахс процессуал тартибда ушланган.

Ҳолат юзасидан Жиззах шаҳар прокуратураси томонидан Жиноят кодексининг 137-моддаси (одам ўғирлаш) 2-қисми тегишли бандлари билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

Тайёрлаган: Асрор Абдуназаров

#Жиззах #одам ўғирлаш