Google фойдаланувчилари реклама кўришга мажбур бўлади

Реклама материалларини блокловчи плагинлар тайёр даромаддан маҳрум қилиб, компанияга зарар келтирмоқда.

Фото: Getty Images

Google компанияси рекламаларни блокловчи плагинларни тақиқламоқчи. Бунинг учун Chrome браузерини янги платформа – Manifest v3’га кўчиришни режалаштирмоқда, деб хабар бермоқда Securitylab.

Маълум бўлишича, Manifest V2 спецификациясига мувофиқ яратилган Chrome кенгайтмалари 2023 йилнинг январидан ишлашни тўхтатади. Шундан сўнг браузер фақатгина Manifest v3 кенгайтмаларини қўллаб-қувватлайди, бунинг натижасида созламаларнинг функциялари сезиларли даражада чекланади ва рекламаларни блокловчи плагинлар ўз самарасини йўқотади.

NoScript, uBlock Origin uMatrix сингари кенгайтмаларни ишлаб чиқарувчиларнинг айтишича, интерфейс рухсат берган фильтрлар ҳатто энг оддий дастурий таъминот учун ҳам етарли бўлмайди. Бу шуни англатадики, Google’да рекламалардан қочиш бундан буён имконсиз. Корпоратив мижозларгагина рекламаларни блоклаш имконияти тақдим этилиши мумкин.

«Бир неча йил давомида ишлаб чиқилган Manifest V3 аввалгисидан кўра хавфсизроқ,самаралироқ ва махфийлик нуқтайи назаридан янада ишончлироқ», – деб таъкидлайди Chrome кенгайтмалари ва Chrome Web Store интернет дўкони маҳсулотлари бўлими менежери Дэвид Ли.

Тайёрлаган: Дилшод Аскаров

#Google