АҚШ Чехияга россиялик Никулин экстрадицияси учун миннатдорлик билдирди

АҚШ Оқ уйи матбуот котиби Сара Сандерс Чехияга россиялик Евгений Никулиннинг экстрадицияси учун миннатдорлик билдирди, у ҳакерлик ҳужумларида айбланмоқда. Бу ҳақда РИА «Новости» хабар берди.

«Қўшма Штатлар Чехия Республикасига Евгений Александрович Никулин топширилгани учун миннатдорлик билдиради, у, тахминларга кўра, LinkedIn, Dropbox ва Formspring’га тегишли компьютерларни бузиб кирган. Россия фуқароси бўлган Никулин Чехия ҳуқуқни муҳофаза қилиш органлари томонидан ҳибсга олинди ва Чехияда 2016 йилнинг октябрь ойидан бери қамоқда сақланаётганди. Жиноятчиларни жавобгарликка тортиш интернет ишончилилигини таъминлаш ва бизнинг асосий қадриятларимизни ҳимоя этишнинг асосий жиҳати саналади», - дейилади Сандерс баёнотида.

Қўшма Штатлар Чехия ҳукуматига экстрадиция бўйича масала «адолатли» ҳал этилгани учун ҳам миннатдорлик изҳор қилган.