Жанубий Корея Ўзбекистонда электропоездлар фаолиятини йўлга қўйишга кўмак беради

Ўзбекистон Республикаси Президенти Шавкат Мирзиёев 3 май куни Корея Республикасининг Шимол билан иқтисодий ҳамкорлик бўйича қўмитаси раиси Сон Ён Гил бошчилигидаги делегацияни қабул қилди.​

Жанубий Корея делегацияси вакилининг айтишича, учрашувда ўзаро тузилган лойиҳаларни ўз вақтида ва тўла бажарилишини таъминлаш масаласига катта эътибор қаратилган.

"Президент Шавкат Мирзиёев билан Ўзбекистонда тезюрар электропоездлар ҳаракатини йўлга қўйиш ва айни йўналишда фаолият олиб борувчи Hyundai Rotem компанияси билан ҳамкорлик, бундай бизнес доираларининг ўрни юзасидан фикрлашдик", дейди Сон Ён Гил.

Икки давлат вакиллари Ўзбекистон Республикаси билан Корея Республикаси ўртасидаги стратегик шериклик ва кўп қиррали ҳамкорлик изчил ривожланиб бораётганини чуқур мамнуният билан қайд этди.​