Ангрен шаҳар мактабларида “Она тили ва адабиёти” фан ойлиги доирасида ўзбек тили муаммолари ҳам муҳокама қилинмоқда

2018 йилнинг октябрь ойи давомида Ангрен шаҳар Халқ таълими бўлими тасарруфидаги барча умумий ўрта таълим мактабларида “Она тили ва адабиёти” фан ойлиги тадбирлари ўтказилмоқда. Бу ҳақда Ангрен шаҳар Халқ таълими бўлими матбуот хизмати Kun.uzʼга маълум қилди.

Таъкидланишича, мазкур фан ойликларида ўқувчилар учун “Тил – миллат қуёши” , “Она тилим жон-у дилим” , “Миллатим фахрисан, онажон тилим” каби мавзуларда иншо ва расмлар, оммавий диктант танловлари, мунозара, очиқ дарслар, таниқли ёзувчи, шоир ва журналистлар иштирокида учрашувлар ташкил этиляпти.

Хусусан, 14 октябрь куни 35-умумий ўрта таълим мактабида бошланғич синф ўқувчилари учун диктант, юқори синф ўқувчилари ўртасида эса иншо ёзиш бўйича оммавий танловлар ташкил этилди. Унда ўқувчиларнинг диктант ва иншо ёзиш борасидаги саводхонлиги синовдан ўтказилди.

“Тил – миллат кўзгуси” мавзусидаги танлов 5-умумий ўрта таълим мактабида ўтказилди. Унда ўқувчилар ўзбек тили ривожига тўсиқ бўладиган сабаблар юзасидан “Мунозара” танловида баҳслашди. Баҳсларда ўқувчилар томонидан нутқда чет тилларидан кириб келган сўзларни қўшиб гапириш, имло қоидаларига амал қилмаслик каби иллатлар танқид остига олинди. “Мунозара” мусобақаларида фаол иштирок этган ўқувчиларни мактаб маъмурияти ўзбек адабиётининг таниқли ёзувчи ва шоирларининг китоблари билан тақдирлади.

“Она тили ва адабиёт“ фан ойлиги тадбирлари 4-умумий ўрта таълим мактабида байрам дастури сифатида ўтказилди. Мазкур байрам тадбирида ўқувчилар ўзбек тили давлат тили мақомини олиши тарихи, ўзбек тилида ижод қилган ёзувчи ва шоирлар ҳаёти бўйича маълумотлар келтирди. Шунингдек,тил ҳусусан, ўзбек тили борасида ёзилган шеьр ва қўшиқлар ўқувчилар томонидан ёддан айтиб берилди.

19 октябрь куни Ангрен шаҳридаги 17-умумий ўрта таълим мактабида халқимизнинг ардоқли шоири Муҳаммад Юсуф ҳаёти ва ижодига бағишланган учрашув бўлиб ўтди. Унда таниқли шоир, ёзувчи ва журналистлар  иштирок этди. Тадбир меҳмонлари ўз ижод намуналаридан ўқиб беришди, шунингдек, адабиёт, ижод борасида ижодкорлар ҳамда ўқувчилар ўртасида қизғин суҳбат кечди.

Ўтказилаётган шу каби тадбирларда ўқувчиларга нафақат ўзбек тилининг имкониятлари кенглиги, унинг бойлиги, жозибадорлиги, балки, кундалик мулоқотда, тижорий ташвиқотларда, хизмат кўр­сатиш шохобчаларида она тилимиз қо­либ, ажнабий тилни қўллаш, пешлавҳаларда имло қоидаларига амал қилмаслик, сўзларни бузиб ишлатиш ва талқин этиш ҳолатлари тилнинг қадрини тушириб, уни аста-секинлик билан йўқолиб боришига хизмат қилиши борасида тушунчалар берилмоқда, дейилади матбуот хизмати хабарида.