Google Play ва App Store даромадлари 40 фоизга ўсди

Google Play ва App Store иловаларидан тушган даромад 2016 йилда 40 фоизга ўсди. Бу ҳақида App Annie таҳлил  компанияси ҳисоботида хабар берилди. 

Ўтган йили Google Play ва App Store иловалар сотувидан 35 миллиард доллар ишлаб олганди. Бир йилда жами 90 миллиард илова юкланган, бу 2015 йилга нисбатан 15 фоизга кўп демакдир.  Google Play ва iOS'да ушбу кўрсаткич 13 миллиардга ошган. Юкламалар сони бўйича етакчилик аввалгидек Google Play'га тегишли, бироқ App Annie'да таъкидланишича, App Store ўсиш суръатларини оширишда давом этмоқда. 
 
Фойдаланувчиларнинг иловаларда ўтказган вақти 2016 йилда 25 фоизга кўпайган ва 900 миллиард соатни ташкил қилган. Гап Android-смартфонларда ўтказилган вақт ҳақида бормоқда, Хитой бундан мустасно. Ҳар бир Android-фойдаланувчи 2016 йилда кунига ўртача икки соат вақтини иловаларда ўтказган.

iOS платформасидан юклаш бўйича етакчиликни Хитой қўлга киритди, Android орқали эса - Ҳиндистон, мамлакат бу борада АҚШ ва Бразилияни ортда қолдирди. App Store иловаларидан даромад олиш даражаси бўйича етакчилик ҳам Хатойга насиб этди, Google Play иловаларидан тушувчи даромадлар борасида эса Япония биринчи бўлди.