"Бригада" сериали қаҳрамонлари 15 йилдан сўнг...

2002 йилда намойиш қилинган "Бригада" сериали Россия телевидениесида ўчмас из қолдирган, мухлислар 90-йиллардаги бандитча воқеалар шодасидан иборат сериални ҳануз юзда табассум билан эслашади.

Уюшган жиноий гуруҳнинг тўрт нафар иштирокчиси ўз замонасининг энг машҳур қаҳрамонларига айланди. "Гигант сага" актёрлари бугун нималар билан банд экани қизиқ бўлса, қуйида тақдим этилувчи маълумотлар сиз учун.

Сергей Безруков

43 ёшда

Безруковнинг карьераси театр саҳнасидан бошланган. 90-йилларда у "Ревизор", "Ақл бовар қилмас кун ёки Фигаронинг уйланиши" каби қатор спектаклларда роль ўйнаган.

Бу вақтга келиб Безруков машҳур ёш театр актёри бўлган, бироқ ҳақиқий юлдузлик онлари уни олдинда телевидениеда кутаётганди. 2002 йилда "Бригада" сериали экранларга чиқди ва унда Сергей Безруков гангстер "Саша Белый" ролида намоён бўлди.

Актёр ўз қаҳрамонини ҳурмат қилган. "Менинг барча қаҳрамонларим - ижобий, жумладан "Саша Белый" ҳам, - деган Безруков интервьюлардан бирида. - Унинг нимаси ёмон? У бандитлар оламида ахлоқий қонунларини тарғиб қилади".

"Агар улғайиб келаётган авлоднинг барча вакиллари у каби  кучли ва дадил бўлганда эди, жуда яхши бўларди", - дейди у.

Кейинроқ, бандит образидан халос бўлиш мақсадида  Безруков Есенин ва Пушкин ролларини, ҳатто "Участок" сериалида милиционер ролини ҳам ижро қилди.

2015 йилнинг баҳорида 15 йил бирга яшаган биринчи турмуш ўртоғи Ирина билан ажрашди. Ажримдан сўнг Безруков режиссёр Анна Матисонга уйланди. Ҳозирда жуфтликнинг 1 ёшли қизи бор (биринчи оиласидан фарзанди йўқ).

Дмитрий Дюжев

38 ёш

"Космос" роли Дюжевнинг кинодаги олтинчи иши бўлди.  Бироқ бу унинг биринчи бош роли эди. Дюжев бандитлар мавзусини Алексей Балабановнинг "Жмурки" фильмида ҳам давом эттирди, "Қатъий режим таътиллари" комедиясида эса Безруков ва Дюжев қамоқхонадан қочган "зэк"лар ролини ўйнаб, ўзларининг гангстерлик амплуалари устидан кулишган.

Дюжевнинг ҳаётида оғир дамлар кўп бўлган. 1998 йилда Дюжевнинг 12 ёшли синглиси Настя лейкемияга чалиниб, ҳаётдан кўз юмди.

4 йил ўтгач ("Бригада" намойиш қилинган йили), қизининг ўлимидан ўзига кела олмаган отаси ўз жонига қасд қилган, ундан бир йил кейин эса Дмитрийнинг онаси ҳам вафот этган - унинг ўлимига юрак хуружи сабаб бўлган.

Мана 10 йилдирки, Дмитрий Дюжев Татьяна Зайцева билан бахтли ҳаёт кечириб келмоқда. Оилада икки ўғил - Иван ва Дмитрий вояга етмоқда.

Павел Майков

41 ёш

Павел ҳам Дюжев каби илк бош ролини "Бригада"да ўйнаган - бунга қадар эса "Сибирский цирюльник"да каскадёр бўлиб ишлаган ва Тигран Кеосаяннинг "Мужская работа" фильмида эпизодда кўриниш берган.

Асосий ролдаги бошқа актёрлар билан бўлганидек, "Пчела" роли Майковга мисли кўрилмаган машҳурлик олиб келди.

Бироқ актёрнинг кейинги карьераси қолган йигитларга нисбатан муваффақиятсиз давом этди.

Яқинда Майков "Измены" ва "Вы все меня бесите" сериалларида роль ўйнади. Павел ва актриса Екатерина Масловскаянинг 14 ёшли Даниил исмли ўғиллари бор.

Владимир Вдовиченков

45 ёш

Владимир Вдовиченков ВГИКда ўқиб юрган кезларидаёқ кинода роль ўйнай бошлаган. Дарвоқе, у институтга 25 ёшда кирган. Ўша йиллари Владимирнинг биринчи — Дельфиннинг "Дилер" клипидаги роли анча машҳур бўлганди.

Бунга қадар Вдовиченков флотда хизмат қилган. Армияга боргиси келмаган, бироқ ундан қочиш нияти ҳам йўқ эди, шу боис Кронштадтдаги денгизчилар мактабига ўқишга кирган.

"Мен ёрдамчи Шимолий ҳарбий флотга тақсимланган. Биз сув ости қайиқлари ва бошқа кемаларга хизмат кўрсатиш билан шуғулланар эдик", - дейди у.

Уч йил ишлаб, ҳарбий чиптасини қўлига олган. Вдовиченковнинг ҳаётида "денгиз даври"дан кейин касблар борасида тажрибалар даври бошланган. Охир-оқибат у Москва шаҳрига бориб, актёр бўлишга қарор қилган.

Вдовиченков дастлаб эпизодларда роль ўйнаган - масалан, "Граница. Таёжный роман" ва "Марш Турецкого" сериалларида.

Бироз вақт ўтиб, бош ролларга таклифлар туша бошлаган. "Гражданин начальник" сериалида у Коля-афғончи, "Бригада"да эса — "Фил" ролида намоён бўлган

Актёрнинг кейинги танилган роли - яна бир бандитча драма ҳисобланган "Бумер"даги Костя "Кот" роли.

Актёрнинг шахсий ҳаёти профессионал ҳаёти каби "қайноқ" бўлган. Вдовиченков биринчи марта 18 ёшида синфдошига уйланган, иккинчи турмуши - 20 ёшида, учинси эса - 27 ёшида қайд этилган. 2005 йилда эса у янги муҳаббатини учратган. Бу - актриса Ольга Филиппова эди. 2005 йилнинг 21 апрелида Ольга ва Владимир қиз фарзандли бўлишган. 2014 йилда эса Вдовиченков қизининг онаси билан ажрашган ва бир йилдан сўнг Елена Лядовага уйланган.

Екатерина Гусева

40 ёш

Катя Гусева илк ролини унча танилмаган "Змеиный источник" триллерида ижро этган. Бироқ 5 йилдан сўнг уни "ютуқ чиптаси" — "Бригада"да Сашанинг турмуш ўртоғи роли кутиб турарди. Сериал намойиш этилган 2002 йил актриса учун  катта ҳалокат ҳам келтирган: Дубровкадаги Театр маркази биносида Гусева ўйнаган "Норд-Ост" мюзикли труппаси террорчилар томонидан қўлга олинган.

Ўша оқшом саҳнада Екатеринанинг бошқа актёрлик таркибидаги ҳамкасблари бўлган, уч кун теракт давомида актриса театр деворларини тарк этмаган. Охир-оқибат труппанинг 17 нафар актёри ва 2 бола ҳалок бўлган.

Екатерина Гусева турмуш ўртоғи - ишбилармон Владимир Абашкин билан 19 ёшли ўғли Лёша ва 7 ёшли қизи Аняни тарбияламоқда.