Британия Украинага Storm Shadow ракеталарининг янги партиясини юборди

Буюк Британия яқинда Украина қуролли кучлари Россиянинг ичкари ҳудудларига зарбалар йўллашни давом эттириш учун Киевга Storm Shadow ракеталарининг янги партиясини юборган, деб хабар тарқатди Bloomberg агентлиги манбага таяниб.

Бу қиш бошланиши арафасида Украинани ракета захиралари билан таъминлаш мақсадида амалга оширилган – чунки Буюк Британия Россия Украина тинч аҳолисига ҳужумларни кучайтиришидан хавотирда, дейди агентлик суҳбатдошлари.

Янги партияда айнан қанча ракета етказиб берилганига аниқлик киритилмаган.

Bloomberg ёзишича, ҳозирда Буюк Британия ва бошқа иттифоқчилар Россия президенти Владимир Путинга Киевни қўллаб-қувватлаш ўзгармас бўлиб қолишини ва бундай қўллов Россия иқтисодиётининг уруш олиб бориш имкониятларидан юқори бўлишини кўрсатишга интилмоқда.

Буюк Британия, АҚШ каби, можаронинг жиддий авж олишидан хавотирланиб, узоқ вақтгача Россиянинг халқаро миқёсда тан олинган ҳудудларига ўз ракеталари билан зарба берилишини тақиқлаб келганди. Тақиқ фақат 2024 йил ноябрида қисман бекор қилинди – ўшанда Украина қуролли кучларига Россиянинг Украина билан чегарадош областларидаги нишонларга зарба йўллашга рухсат берилгани хабар қилинганди.

Икки ҳафта олдин The Wall Street Journal ўз манбасига таяниб, АҚШ узоқ масофали ракеталар билан РФ бўйлаб зарба берилишига чекловларни тўлиқ олиб ташлаганини хабар қилганди. Бу Storm Shadow ракеталари учун ҳам тааллуқли: улар Буюк Британия томонидан етказиб берилса ҳам, нишонларни белгилаш учун Америка разведка маълумотларидан фойдаланилади.

Storm Shadow’​​дан Россия ҳудудига зарба беришда фойдаланиш билан боғлиқ сўнгги маълум ҳолат Украина қуролли кучлари томонидан Брянскдаги ҳарбий маҳсулотлар ишлаб чиқариладиган кимё заводига ҳужум қилиниши бўлган. Маҳаллий расмийлар ҳужум оқибатида жабрланлан йўқлигини маълум қилган. Заводга етказилган зарар миқдорига аниқлик киритилмаган.

Украинага Storm Shadow’нинг янги партияси юборилгани ҳақидаги хабар АҚШ президенти Доналд Трампнинг Украинага узоқ масофали Tomahawk ракеталарини бериш ниятида эмаслиги ҳақидаги баёнотидан бир неча соат ўтиб пайдо бўлди. У келажакда ўз қарорини ўзгартириши мумкинлигини истисно этмаган, бироқ «ҳозирча жавоб – йўқ».

Tomahawk ракеталарининг эҳтимолий етказиб берилиши бўйича фаол мунозаралар октябр ойида, Трампнинг ўзи бунга ишора қилганида бошланган эди. 17 октябр куни Оқ уйда Трамп ва Зеленский ўртасида бўлиб ўтган музокараларда ҳам асосий мавзу шу қуролларни етказиб бериш масаласи бўлганди. Ўша учрашув арафасида Владимир Путин Трампга қўнғироқ қилиб, ракеталарни етказиб беришга розилик билдирилган тақдирда Москва ва Вашингтон ўртасидаги муносабатлар ёмонлашиши хавфи ҳақида огоҳлантирган.

Зеленский билан учрашувда бу борада келишувга эришилмади, Трамп Tomahawk ракеталари АҚШнинг ўзига кераклигини айтди. Шу билан бирга, CNN телеканали манбалари хабар беришича, Пентагон президентлар учрашувидан олдинроқ ракеталар етказиб берилишини маъқуллаган – бу Қўшма Штатлардаги захираларга зарар етказмайди деб топилган.