Ёшлар ўртасида тўрт босқичли спорт мусобақалари ташкил қилинади

Вазирлар Маҳкамасининг “Аҳолининг соғлом турмуш тарзини қўллаб-қувватлаш ва жисмоний фаоллигини оширишга доир қўшимча чора-тадбирлар тўғрисида”ги қарори қабул қилинди.

Ҳужжат билан, “Пандемияни спорт орқали енгамиз!” ғоясини ўзида мужассам этган Ўзбекистон Республикасида 2021-2022 йилларда спорт сиёсатини жадаллаштириш дастури; 

“Соғлом аёл - буюк келажак” ғоясини ҳаётга татбиқ этишга қаратилган хотин-қизлар ўртасида соғлом турмуш тарзини мустаҳкамлаш, уларни жисмоний тарбия ва спорт билан оммавий тарзда шуғулланишга жалб қилиш чора-тадбирлари дастури;

2020-2022 йилларда Ўзбекистонда спорт ва экстремал туризмни ривожлантириш бўйича чора-тадбирлар дастури;

Ўзбекистон Республикасида миллий спорт турларини ва халқ ўйинларини янада ривожлантириш чора-тадбирлари режаси тасдиқланди.

Ўзбекистон миллий телерадиокомпаниясига Жисмоний тарбия ва спорт вазирлиги, Соғлиқни сақлаш вазирлиги, Электрон оммавий ахборот воситалари миллий ассоциацияси билан биргаликда 2020 йил 1 декабрдан бошлаб соғлом турмуш тарзини тарғиб қилишга қаратилган ижтимоий видеороликларни “Прайм-тайм” вақтида бепул намойиш этиш тавсия этилди.

Жисмоний тарбия ва спорт вазирлиги Олий ва ўрта махсус таълим, Халқ таълими, Маҳалла ва оилани қўллаб-қувватлаш вазирликлари, Ўзбекистон Миллий олимпия қўмитаси, Туризмни ривожлантириш давлат қўмитаси билан биргаликда 2021 йилдан бошлаб:

а) йил давомида аҳоли, шу жумладан ёшлар ўртасида тўрт босқичли (маҳалла, туман (шаҳар), вилоят, республика) юриш ва югуриш, бадминтон, стритбол, мини футбол, велоспорт, “Workout” бўйича спорт мусобақаларининг ташкил қилинишини;

б) “Отам, онам ва мен — соғлом оиламиз!” шиори остида телевизион оилавий спорт мусобақаларининг маҳалла, туман, вилоят ва республика босқичларини ўтказиш орқали барча оила аъзоларини спорт билан шуғулланишга жалб қилинишини;

в) умумтаълим мактабларида “Биз билан бажар, биздек бажар, биздан яхшироқ бажар!” шиори остида синфлараро спорт мусобақаларининг ташкил қилинишини таъминлайди.