Мадуро ўзига нисбатан қилинган суиқасддан кўзланган мақсадни айтди

Венесуэла президенти Николас Мадурога суиқасд уюштиришдан мақсад мамлакатни зўравонлик ботқоғига ботириш бўлган.

"Улар нафақат президентни, балки мамлакатни, тинчлик, демократик ғояларни ўлдиришга, Венесуэла сиёсий ва ижтимоий ҳаётини зўравонлик ботқоғига ботиришга уринишди", — деди у давлат телевидениесида чиқиш қилиб.

Мадуронинг таъкидлашича, у фитначилар томонидан минбар томон йўлланган учувчисиз учар қурилмани шахсан кўрган. 

"У шовқин солиб бошимиз узра ўтди. Мен нутқ сўзлашда давом этдим ва дрон минбар томон ҳаракатлана бошлади. Агар у олдимизда пайдо бўлганида бизни ўлдириш учун сониялар кифоя қиларди", — деди президент.

Мадуро шунингдек, дрон портлашидан тешилиб кетган ҳарбийлар фуражкасини ва қон излари бўлган металл шарчани намойиш қилди.

"Бу менга ва сенга қарши қаратилган террорчилик ҳужуми эди", – деди у.

Унинг сўзларига кўра, дронларни иккита гуруҳ бошқарган, террорчиларнинг бир гуруҳи Колумбиянинг Норте-де-Сантандер департаментидаги Чинакоте шаҳрида тайёргарликдан ўтган.

Мадуро шунингдек, дастлабки гумонланувчилар ҳужумдан 10-15 дақиқа ўтибоқ қўлга олинганини маълум қилди. 

"Менга ички ишлар вазири Ревероль қўнғироқ қилиб, дронларни бошқаришда гумонланган икки шубҳали шахс қўлга олинганини, улар суиқасдга алоқадор бўлишлари мумкинлигини хабар қилди. Яна бир неча дақиқадан сўнг иккинчи гуруҳ қўлга олинди.

Энди гуруҳларни бошқарган ташкилотчилар ва уларнинг молиячиларини аниқлаймиз", – деди президент.

Венесуэла етакчиси суиқасдда мухолифат етакчиларидан бири Хулио Борхес ва парламент депутати Хуан Рекесенсни айблади. У АҚШ ва Колумбия ҳукуматларидан суиқасдга алоқадор шахслар ҳақида маълумот беришларини сўради.

Шанба куни Мадуро нутқ сўзлаётган минбар томонга портловчи модда ўрнатилган бир нечта дрон йўналтирилди. Хабарларга кўра, суиқасд вақтида етти киши жароҳатланган.

Мадуро суиқасд уюштиришда мухолифат ва Колумбия президенти Хуан Мануэл Сантосни айблади. Колумбия ТИВ воқеага алоқадорлигини рад этди.