Президент Мирзиёевнинг улкан ислоҳотлар дастури салмоқли ютуқларга эришмоқда — Помпео

2 февраль куни кечқурун Тошкентга келган АҚШ Давлат котиби Майкл Помпео твиттердаги саҳифасида мамлакатга ташрифдан кўзланган мақсадлар ҳақида ёзиб қолдирган.

«Бугун Ўзбекистонга ташриф. Мамлакат президенти Мирзиёевнинг улкан ислоҳотлар дастури салмоқли ютуқларга эришмоқда, мен ҳамкорлигимиз орқали тинчлик, фаровонлик ва хавфсизликни янада кучайтиришни давом эттириш йўлларини муҳокама қилишни сабрсизлик билан кутмоқдаман», дея ёзган у твиттерида.

Visiting #Uzbekistan today. @President_UZ Mirziyoyev’s ambitious reform agenda is yielding significant progress, and I look forward to discussing ways to continue advancing peace, prosperity, and security through our partnership. pic.twitter.com/YEhzZiMsUT

— Secretary Pompeo (@SecPompeo) February 3, 2020

У шунингдек Тошкент шаҳри бош имом хатиби Нуриддин Холиқназаров ва бошқа диний фаоллар билан учрашган.

«Ўзбекистон диний етакчилари билан ислоҳотлар ва ҳуқуқий ўзгаришлар диний эркинликка қандай ҳисса қўша олиши мавзусида суҳбатлашдик. Ҳукумат томонидан ушбу соҳада эришилган ютуқлар менда катта таассурот қолдирди ва Ўзбекистоннинг кейинги муваффақиятларини сабрсизлик билан кутаман», деган у.

Бугун АҚШ Давлат департаменти делегацияси Президент Шавкат Мирзиёев томонидан қабул қилиниши кутилмоқда.

Шунингдек, АҚШ Давлат котиби Тошкент шаҳрида ўтказиладиган «Марказий Осиё—АҚШ» («C5+1») шаклидаги вазирлар учрашувида иштирок этади.