Фото: Канададаги ўрмон ёнғинлари Нью-Йоркни қуюқ тутун ичида қолдирди

Қуйидаги фотосуратларда Озодлик ҳайкали деярли кўринмай қолган. Шаҳардаги осмонўпар биноларни ҳам кўриш қийинлашган.

Канадада кучли ўрмон ёнғинлари давом этмоқда. Мамлакат ҳукумати хабар беришича, 7 июн куни 414 та ўрмон ёнғини қайд этилган, шундан 239 тасининг тарқалиши ҳали назоратга олинмаган. Олов қамраб олган майдон ҳажми — 3,8 миллион гектарни ташкил этади. Канадада икки ҳафта олдин бошланган ёнғинлар АҚШ шимолидаги шаҳарларга таъсир қилмоқда. 6 июн куни Нью-Йорк дунёдаги барча йирик мегаполислар орасида ҳаво ифлосланиши энг юқори бўлган шаҳарлар рўйхатида биринчи ўринга чиқиб қолди. Маҳаллий мактаблар ва бошқа таълим муассасалари очиқ ҳавода режалаштирилган машғулотларни бекор қилмоқда. Нью-Йорк осмони кулранг ва тўқ сариқ рангга бурканган. Шаҳар мэри Эрик Адамс аҳолини кўчада ниқобда юришга ва имкон қадар деразаси ёпиқ бўлган хоналарда қолишга чақирди. Қуйида Нью-Йоркнинг бугунги кундаги манзаралари акс этган суратлар.