«Рус танклари Киевга тўрт соатда етиб бориши мумкин эди» – Трамп яна Россияни мақтади

Доналд Трамп Россия президенти Владимир Путиннинг АҚШга келишини «ҳурмат ифодаси» сифатида кўради. У 11 август куни Оқ уйдаги матбуот анжуманида шу ҳақда гапирди.

Трамп Путин билан бўлажак учрашувнинг асосий вазифаси Украинадаги можарони тўхтатишдан иборат эканини таъкидлади. У Аляскадаги учрашув давомли учрашувлардан биринчиси бўлиши, унда келишув тузиш имконияти аниқлаб олинишини билдирган. Бундан ташқари, Америка етакчиси Путин ва Зеленский ўртасида ҳам учрашув ўтказиш ташаббуси билан чиқмоқчи.

«Унинг келишувга тайёр ёки тайёр эмаслигини билиб олиш учун менга икки дақиқа етарли бўлади. Кейин мен дарҳол Зеленскийга қўнғироқ қиламан.

Аляскада у бўлмайди: у аллақачон кўп учрашувларда бўлди ва бу ҳеч қандай натижа бермади.

Путин фақат мен билан гаплашишга тайёр. Мен унинг кўнглидагини билиб оламан ва агар бу тўғри келишув бўладиган бўлса, унинг шартларини европаликлар ва украинларга етказаман. Кейин эса Зеленский ва Путин учрашади, мен билан ёки менинг иштирокимсиз. Катта эҳтимол билан, бизни ҳудудий алмашув кутмоқда», деган АҚШ президенти.

Трамп Зеленскийнинг конституция ҳудудий алмашувга йўл қўймаслиги ҳақидаги сўзларини унга оғир ботганини айтиб ўтган.

«Зеленскийнинг конституция буни тақиқлаши ҳақидаги гапи мени ранжитди: яъни унга уруш олиб бориш ва ҳаммани ўлдиришга рухсат берилган, лекин ҳудудларни алмашишга рухсат берилмаган.

Россия кўплаб қимматли ерларни, асосан океан соҳилларини (катта эҳтимол билан, океан эмас, денгизни назарда тутган. Россия Украинанинг Азов денгизи соҳилларини тўлиқ ва Қора денгиз соҳилларини қисман эгаллаган) эгаллаб олди ва биз бу ерларнинг бир қисмини Украинага қайтаришга ҳаракат қиламиз».

АҚШ президенти Россияни Наполеон ва Ҳитлер устидан ғалаба қозонган давлат сифатида мақтаган:

«Россия урушқоқ давлат, улар жуда кўп урушларни бошдан кечирган. <...> Улар худди биз каби Ҳитлерни енгиган. Улар Наполеонни мағлуб этишган.

Бир пайтлар Венгрия бош вазиридан Украина Россияни мағлуб эта оладими, деб сўраган эдим. У менга саволни аҳмоқона деб ҳисоблагандек қаради ва: „Хитой савдода, Россия эса урушда ғалаба қозонмоқда“, деди».

Трамп Россия танклари Киевга етиб бора олмаганига сабабчи бўлган рус генерали ҳақида ҳам гапирган.

Унинг фикрича, Россия танклари агар шоссе бўйлаб ҳаракатланганида, Киевга тўрт соатда етиб борган бўларди, аммо «генераллар»дан бирининг қишлоқ хўжалиги ерлари орқали ҳаракатланиш тўғрисидаги «доҳиёна» қарори туфайли машиналар лойга ботиб қолган.

«Мен бу генерал кимлигини билмайман, аммо Владимирни биламан, уни ҳар қандай буйруқ бериш ҳуқуқидан маҳрум қилган», – деган Америка президенти.

У украинларга танкка қарши Javelin ракета тизимлари ёрдам берганини қўшимча қилган. Унинг биринчи президентлик даврида ушбу техникани етказиб бериш маъқулланганди. «Агар мен бўлмаганимда, жангларнинг дастлабки кунларида ишдан чиқарилган бу танкларнинг барчаси <...> шосседа ҳаракатланганида, тўрт соатда Киевда бўларди», – дея қўшимча қилган Оқ уй раҳбари.

Катта эҳтимол билан, Трамп 2022 йилда «Восток» гуруҳини бошқарган генерал-полковник Александр Чайко ҳақида гапирган. У ўша йил май ойида лавозимидан четлатилганди.

Қайд этиш керакки, Россия танклари Украинага кенг кўламли босқиннинг илк кунларида Киевга бир неча йўналишда шосселар орқали ҳаракатланган зирҳли техникалар колоннаси билан бостириб келган, аммо шаҳар атрофида украин ҳарбийлари қаршилигига учраб, катта йўқотишларга учраган, якунда ортга чекинишга мажбур бўлганди.