Ҳиндистонда футбол мухлислари Месси сабабли стадионни вайрон қилишди

Ҳиндистонда аргентиналик футболчи Лионел Мессининг ташрифи тартибсизликларга сабаб бўлди, деб хабар берди India Today.

Хабарга кўра, тижорат тури доирасида Ҳиндистонга келган Месси Калкуттадаги Vivekananda Yuvabharati Salt Lake Stadium стадионига ташриф буюрган. Ўн минглаб ишқибозлар йиғилган тадбир учун энг арзон чипта 5 минг рупиядан (55 доллар) сотилган.

Гувоҳларнинг айтишича, Лионел Мессининг стадион бўйлаб айланиб чиқиши режалаштирилган, аммо бу амалга ошмаган. Футболчи майдонга чиқиши билан сиёсатчилар, амалдорлар, машҳур юлдузлар ва уларнинг оила аъзолари ҳамда журналистлар қуршовида қолган. Мессининг хавфсизлик хизмати унинг стадионни айланишини бекор қилишга мажбур бўлган.

Футболчининг атиги ўн дақиқада майдонни тарк этиши эрталабдан стадионга йиғилган оломоннинг ғазабига сабаб бўлган. Улар қўлларига кирган буюмларни стадионга улоқтирган, реклама тахталарини синдириб ташлашган ва хавфсизлик хизмати ходимлари тартибсизликларни куч билан бостиришга мажбур бўлган.

Месси ва юқори мартабали амалдорлар кучайтирилган қўриқчилар қурошовида стадионни тарк этган. 

Лионел Месси тур доирасида Ҳайдаробод, Мумбай ва Деҳли шаҳарларида ҳам бўлади. Унга Луис Суарес ва Родриго де Паул ҳамроҳлик қилади. 

Аввалроқ Калкуттада Мессининг баландлиги 21,3 метрли ҳайкали очилганди.