Оқ уй: Трамп ҳам Россиядан, ҳам Украинадан «жуда норози»

АҚШ президенти Доналд Трамп ҳам Россия, ҳам Украинадан «жуда норози» ва улар орасидаги урушнинг имкони борича тезроқ тугашини истайди, деб билдирди пайшанба, 11 декабр куни Оқ уй матбуот котиби Кэролайн Ливитт.

«У фақат учрашув учун ўтказиладиган учрашувлардан безор бўлди. Энди у гап-сўзларни эмас, ҳаракатларни истайди, бу урушнинг тугашини хоҳлайди. Фақат сўнгги бир неча ҳафта ичида АҚШ маъмурияти россияликлар, украиналиклар ва европаликлар билан учрашувлар ва мулоқотлар учун 30 соатдан ортиқ вақт сарфлади», — деди Ливитт.

Унинг қўшимча қилишича, АҚШ ҳокимияти ҳар икки жанг қилаётган томон билан ишлашни давом эттиради.

13 декабр куни Парижда Германия, Буюк Британия, Франция ва Украина вакиллари ўртасида ўтадиган учрашувда АҚШ иштирок этадими-йўқми, деган саволга жавоб бериб, Оқ уй матбуот котиби бу масалани очиқ қолдирди:

«Агар тинчлик келишувини имзолаш учун реал имконият пайдо бўлса, агар бу учрашувлар Қўшма Штатлар учун шу дам олиш кунларида сарфланган вақтга арзийди, деб ҳис қилсак, унда биз ўз вакилимизни юборамиз», — деди у.

Бундан олдин Германия канцлери Фридрих Мерц АҚШ президентига «Украина қайси ҳудудий имтиёзларга боришга тайёр» экани ҳақида таклифлар етказилганини айтган эди. Бу таклифлар унинг сўзларига кўра, ўтган куни бўлиб ўтган телефон суҳбатидан сўнг тайёрланган — унда Мерц ва Трампдан ташқари, Франция президенти Эммануэл Макрон ва Буюк Британия бош вазири Кир Стармер ҳам иштирок этган.

Мерц мазкур суҳбатни «конструктив» деб атади. Унинг таърифлашича, АҚШ президенти Украинада тинчликка европаликлар билан биргаликда эришишни истайди. Трампнинг ўзи эса бу мулоқотда «кескин сўзлар» бўлганини айтган.

«Биз қарорни улар қайси натижа билан қайтиб келишига қараб қабул қиламиз. Биз вақтни бежизга сарф қилмоқчи эмасмиз», — деди АҚШ президенти 13 декабр куни Украина бўйича Парижда ўтадиган учрашувга таклиф ҳақида изоҳ берар экан.

Ўз навбатида, Украина президенти Володимир Зеленский 11 декабр куни журналистлар билан учрашувда АҚШ билан музокараларда ҳамон тортишувли бўлиб қолаëтган икки бандни санаб ўтди — бу «Донецк вилояти ҳудуди ва у билан боғлиқ барча масалалар», шунингдек Россия қўшинлари томонидан босиб олинган Запорижжя атом электр станциясининг келажакдаги мақоми.

Унинг сўзларига кўра, АҚШ Украина Қуролли кучларига улар назоратида қолиб турган Донецк вилояти қисмидаги позициялардан чиқишни ва мамлакат шарқида демилитаризация қилинган махсус иқтисодий зона яратишни таклиф қилмоқда.

Шу билан бирга, Зеленский таъкидлашича, АҚШ лойиҳасига кўра, Россияга Донецк, Херсон ва Запорижжя вилоятларида қўшин қолдиришга рухсат берилади, аммо Днипропетровск, Харкив ва Сумми вилоятларини тарк этиш мажбурияти юкланади.

Украина президенти таъкидлашича, мамлакат ҳудудига тегишли ҳар қандай имтиёзлар масаласи бутун халқ муҳокамасига қўйилиши керак:

«Менимча, бу саволга украин халқи жавоб бериши лозим. Бу сайлов орқали бўладими ёки референдум орқалими — барибир, бу ҳолда украин халқининг позицияси ифода этилиши керак», — деди Володимир Зеленский.