Тошкент – Самарқанд йўналишида янги тезюрар автомобил йўли қурилади

Номзоднинг сўзларига кўра, келгуси 7 йилда мамлакатга 56 та замонавий самолёт олиб келинади. Авиақатновлар сони 4 баробар оширилади, халқаро парвозлар йўналишлари 5 карра кўпайтирилади.

Бунинг учун:

— ҳудудлардаги 6 та йирик аэропорт хусусий шерикчилик асосида янгиланади;

— «Очиқ осмон» режими барча аэропортларда жорий қилинади (Самарқанд, Бухоро, Урганч, Андижон, Қарши, Термиз ва Нукусга «бешинчи ҳаво эркинлиги» берилган).

Бугунги кунда Тошкент – Самарқанд йўналишида суткасига 35 мингта, Тошкент – Андижон йўлида 30 мингта автомобил ҳаракат қилмоқда. Бу – йўлларга юклама 1,5-2 баробар кўпайган.

Шу боис Шавкат Мирзиёевнинг келтиришича, Европа тикланиш ва тараққиёт банки ҳамда Жаҳон банки кўмагида Тошкент – Самарқанд ва Тошкент – Андижон йўналишларида хусусий шериклик асосида янги тезюрар автомобил йўллари қурилади. Бунга 4 миллиард доллар инвестиция киритилади. Натижада ушбу йўналишларда манзилга етиб бориш вақти 2 баробар қисқаради.

«Осиё инфратузилма инвестициялар банки кўмагида Тошкент – Шаҳрисабз – Термиз (М-39) йўли қайта қурилади, Самарқанд – Бухоро – Олот йўли таъмирланади. Бунга 300 миллион доллар ажратамиз», дея қўшимча қилди Мирзиёев.