Мбаппе учун ултиматум муддати тугади. Буёғига — захира ўриндиғи ёки «Реал» варианти қолди

Қатарнинг қатъияти

«ПСЖ»нинг Килиан Мбаппега нисбатан позициясида амалда ҳеч қандай ўзгариш йўқ. Клуб раҳбарияти ўзини алданган ҳис қилмоқда ва шартномани узайтириш вариантини фаоллаштиришдан бош тортган форвард аллақачон «Реал» билан оғзаки келишиб қўйган ва кейинги йил ёзда Мадрид жамоасига эркин агент сифатида қўшилишни ният қилган, деб ҳисобламоқда. Хафагарчилик сабаби — Мбаппе Парижни текинга тарк этмасликни ваъда қилганида. Футболчининг ўзи эса ўз яқинлари орқали ОАВга чиқарган хабарларда бундай келишув мавжудлигини рад этмоқда. Аммо интернет барчасини ёдда тутади ва RMC Sport хабарига кўра, «ПСЖ»дагилар эринмасдан ҳисоблаб чиқишган: Мбаппе бунгача ҳам саккиз марта шунга ўхшаш гапларни айтган.

Умуман, барча юришлар қайд этилган ва клубдагилар ўз ҳақлигига амин. Жумладан, ўзининг ўжар юлдузини Япония турнесига йўл олган таркибдан чиқариб ташлаш қарори тўғрилигига ҳам. Бу футболчи муайян муддатда шартномани узайтирмаганига жавоб бўлди. Шундан кейин «ПСЖ» янги муҳлатни эълон қилди, унга кўра Мбаппе 31 июлга қадар шартномани узайтириш ёки бошқа клубга кетиш бўйича бир қарорга келиши керак эди. Акс ҳолда у олдиндаги бутун мавсумни захира ўриндиғида ўтказишига тўғри келиши мумкин. Ўтган ҳафта охирида Marca нашри жамоа бош мураббийи Луис Энрике ушбу форвардни янги мавсум учун режаларига киритмаганини ёзиб чиқди. Душанба куни эса Foot Mercato аниқлик киритди: уни захирага ўтқазиб қўйиш бўйича қарор қабул қилиб бўлинган.

Шу билан бирга клуб ва футболчининг вакиллари фақатгина ултиматумлар тилида гаплашаётгани йўқ. «ПСЖ» қўшимча келишув тузиб, муроса йўлини топишга ҳаракат қилмоқда, унга кўра Мбаппе бир йилдан кейин кетиш кафолатини олган ҳолда шартномасини 2025 йил ёзигача узайтириши кўзда тутилган. Футболчи эса, кутилганидек буни рад этган, шундан кейин футболчи билан учрашув сўралган, клуб офисидан келган хатга эса умуман эътиборсиз қолдирган.

Буни ҳам кутилган реакция эди деса бўлади, чунки «Реал» ўтган йили Мадридга текинга келиши кутилган футболчи учун парижликлар клубига пул тўлашни истамайди. Футболчи клубга фақат эркин агент сифатида ўтиши мумкин, «Қироллик клуби»га яқин ОАВнинг ёзишича, француз ҳужумчисига шартнома имзолаши учун аллақачон 130 миллион евро миқдорида бонус (кўтарма пули) ваъда қилинган. Мбаппенинг оиласидагилар бундай маблағдан қуруқ қолишни истамаслиги аниқ. Агар бунга «ПСЖ»дан 2023-24 йиллар мавсумида ҳам клубда қолиши учун тўланиши керак бўлган 80 миллион евро миқдоридаги содиқлик бонуси (бу маблағ 31 июл ва 31 август кунлари иккига бўлиб тўланиши керак эди) ҳам қўшилса, футболчи нима учун амалдаги шартномаси муддати якунигача Парижда қолишга тайёр эканини билдиргани тушунарли бўлади.

Индамасдан қилинаётган босим

1 августга ўтар кечаси барчаси ҳал бўлишини кутиш соддалик бўларди. Айниқса, бир неча кунгина олдин «ПСЖ»дагилар Мбаппени бутун мавсумга жамоадан четлатиш бўйича якуний қарорга кела олмай, Қатардан ҳукм келишини кутиб тургани ҳисобга олинса. Нима бўлганда ҳам, янги шартнома имзолашдан бош тортган Рабиони таркибдан четлатиш билан дунёнинг энг яхши футболчиларидан бири бўйича бундай қарор чиқаришнинг фарқи катта.

Ҳа, баҳорда ҳеч кимни огоҳлантирмасдан Саудияга бориб келган Мессини жаримага тортиш ва вақтинча таркибдан четлатиш орқали «ПСЖ» футболчи клубдан катта бўла олмаслигини намойиш этганди, аммо бу барибир клуб обрўсига зарба бўлганди. Мбаппе билан боғлиқ ҳолат эса — клуб бунга маънавий жиҳатдан ҳақли бўлса ҳам — шартнома ва меҳнат ҳуқуқи тўғридан тўғри бузилиши сифатида қаралади. Франция футболчилар касаба уюшмаси аллақачон бу ҳақда эслатиб ўтди.

Қолаверса, кескин қадамлар футболчининг трансфер нархига жиддий таъсир кўрсатиши тайин, «ПСЖ» эса ҳамон унинг трансферидан имкон қадар кўпроқ пул ишлаб олишдан умид қилмоқда. Ҳам Испаниядаги, ҳам Франциядаги инсайдерлар айни вақтда ҳеч қандай қадам ташламаётган ва изоҳ беришдан қочаётган «Реал» бу билан «ПСЖ»га руҳий босим ўтказаётгани ҳақида якдил фикр билдираётгани бежиз эмас. Мадрид стратегиясини талқин қилишдагина айрим фарқлар бор.

Хусусан, Le Parisien версиясига кўра, испанлар клуби охиригача чўзади ва сўнгги паллада Мбаппени минимал нархда сотиб олади. Ўз навбатида RMC Sport нашри шундай ишонтирган: «ПСЖ»дагилар энди клуб учун камситувчи даражадаги таклиф келишига ҳам тайёр. Парижликлар, табиийки, бундай таклифни рад этади, шундан кейин «Реал» футболчини трансфер қилишга урингани, аммо Париждагилар «йўқ» дейишганини айта олади. «Барселона» билан ўйиндаги 0:3 ҳисобидан кейин ҳам (29 зарба йўлланиб, тўрт бор дарвоза тўсини ёки устуни нишонга олинди, аммо гол урилмади) Париж йўналишида фаоллашишга жазм этилмади. Карло Анчелотти эса жамоа классик «тўққизлик»сиз ҳам жуда кўп вазиятлар яратгани ҳамда ўйинни шу йўналишда такомиллаштиришда давом этишини айтди.

Ечим ёки янги можаро?

Мбаппе фаолиятини давом эттириши учун муқобил вариантлар борми? Афтидан, йўқ. Саудия Арабистонининг «Ал-Ҳилол» клубининг «Реал»га кетишдан олдинги бир мавсум учун 700 миллион евро тўлаш ҳақидаги таклифи кутилганидек саудияликларнинг ўзи томонидан ҳам рад этилди. Фабрицио Романонинг ишонтиришича, АПЛ клублари билан ҳеч қандай музокаралар ўтказилмаяпти. Юрген Клопп эса «Ливерпул»дагилар бу хабарларни кулги билан қарши олишгани, чунки бундай келишувнинг молиявий жиҳатдан имкони йўқлигини тан олди. Душанба куни «Челси» хўжайини Тодд Боэли Носир Ал-Ҳилайфийга қўнғироқ қилгани ва Мбаппе билан музокаралар бошлашга рухсат сўрагани ҳам жиддий истиқболга эга бўлиб кўринмаяпти.

«Барселона» билан боғлиқ сценарий эса каталонияликлар клубидаги молиявий ҳолатдан келиб чиққан ҳолда аввалбошдан фантастик кўринаётганди. Якунда Гави, Рафиня ва Дембелега алмашиш варианти «ПСЖ» томонидан ҳам, Мбаппе томонидан ҳам қабул қилинмаган. Лекин бу режа ортидан Дембеле можароли тарзда клубни тарк этмоқда. L'Equipe версиясига кўра, француз футболчиси бундан хабар топиб ранжиган ва кўк-анорранглилар билан шартномани янгилашдан бош тортган, энди Франция чемпионлари уни 50 миллион евро эвазига трансфер қилиши кутилмоқда.

Аммо Мбаппе билан боғлиқ тарих якуни яқин ва деярли барча манбалар бунга амин: «ПСЖ» футболчини сотишни истаётган, футболчининг ўзи «Реал»га ўтишни орзу қилаётган, Мадрид эса унга эҳтиёж сезаётган паллада, томонлар албатта келишувга эришади. Балки, яқин кунлар ичида. Парижликлар бу масалани Франция чемпионатининг янги мавсуми бошланадиган 12 августга қадар ёпишни истамоқда. Аммо энди гап 230 миллион евро ҳақида бормаслиги тайин.

«Реал» кейинги йил ёзида катта шартнома таклиф қиладиган Англия клублари билан рақобатни бой беришдан чўчиган ҳолда футболчини парижликлар истаган нархга сотиб олишга розилиги ҳақида ёзган ESPN нашри ошириб юборгани аниқ. «ПСЖ» 180-200 миллион евро атрофидаги таклифни қабул қилиши ҳақида ёзган RTL France нашри маълумоти ҳақиқатга яқинроқ. Умуман олганда, буёғи энди техник жиҳатлар. Муҳими шундаки, 2023 йил ёзидаги асосий трансфер достони ҳам мантиқий якунига қараб бормоқда. Мбаппе бир йил давомида захира ўриндиғида ўтиришини тасаввур қилиб бўлмайди. Лекин у олдиндаги мавсумни «Сантяго Бернабеу»да оқ футболкада ўтказишини тасаввур қилиш осонроқ.

Аммо, сериал ҳали чўзилиши эҳтимоли ҳам бор. The Telegraph материали шунга ишора қилмоқда, унинг инсайдерига кўра «ПСЖ» раҳбарларига Мбаппе «Ал-Ҳилол» вакиллари билан ҳатто учрашишни истамагани ёқмаган. Бу эса «Реал» билан келишиб олингани тасдиғи сифатида баҳоланган. Шундай экан, Париждагилар ФИФАга шикоят юбориш эҳтимолини кўриб чиқишмоқда. Мадриднинг Мбаппе билан бундай алоқа ўрнатганини тасдиқлаш нореал бўлса-да, вазият янада мураккаблашиши мумкин.