Житомир яқинидаги портлашлар: икки корхона яксон этилган

Украинанинг Житомир области Березина қишлоғи ҳудудида жойлашган иккита корхонада 2 июл куни кечқурун портлаш содир бўлди. Портлашлар оқибатида икки киши ҳалок бўлган, 24 киши жабрланган, шундан тўрт нафар болалар. Област ҳарбий маъмурияти раҳбари Виталий Бунечконинг сўзларига кўра, ҳалок бўлганлар корхона ходимлари эди, яраланганларнинг кўпчилиги маҳаллий аҳоли вакилларидир.

Портлашлар М-06 Киев – Чоп автомобил йўлидаги иккита ишлаб чиқариш объекти ҳудудида содир бўлди, деди Глубочицк обшинаси раҳбари Сергей Соколский. Унинг сўзларига кўра, иккала корхона ҳам бутунлай вайрон бўлган. Гувоҳлардан бири «Суспiльне»га айтишича, портлашлар уч дақиқа фарқ билан содир бўлган. Расмийлар портлашлар сабабини очиқламаган.

Аввалига портлашлар оқибатида Озарбойжоннинг Socar компанияси ёқилғи қуйиш шохобчасига зарар етгани ҳақида хабарлар тарқалганди. Аммо област маъмурияти раҳбари бу версияни рад этди.

Виталий Бунечконинг айтишича, портлаш оқибатида 25 та уй тўлиқ вайрон бўлган. Маҳаллий ҳукумат жами қанча турар жой биноси шикастлангани тўғрисида кейинроқ маълумот беришини билдирган. Ҳодиса оқибатида электр узатиш линияси ҳам шикастланган, натижада 735 та уй электрсиз қолди, деб хабар берди «Житомироблэнерго».

Портлашдан кейин полиция М-06 трассасининг икки йўналишини ҳам ёпган, ҳаракат айланма йўллар орқали ташкил этилган. Кейинроқ трассада ҳаракат қисман тикланган, икки йўналишда ҳам биттадан полоса бўйлаб юришга рухсат берилган. Йўлда тирбандлик юзага келган. Полиция фақат 3 июл тонгида трасса бўйлаб ҳаракатни тўлиқ тиклаган.

Ҳодисадан кейин Житомир области касалликларни назорат қилиш ва олдини олиш маркази маҳаллий аҳолини деразаларни ёпишга ва кўчага чиқмасликка чақирди.