Гибрид электромобилларни олиб киришда экологик сертификат талаб қилиш тўхтатилди

1 майдан бошлаб Ўзбекистонга гибрид автомобилларни олиб киришда камида Евро-4 экологик тоифасига мослигини тасдиқловчи экологик сертификат талаб қилинаётгани хабар берилганди.

Бу ҳолат сўнгги кунларда тармоқларда муҳокамаларга сабаб бўлди.

Autodeklarant каналининг ёзишича, 3 майдан бошлаб бу талаб бекор қилинган.

«Божхона ходимлари электромобил сифатида расмийлаштирилаётган гибрид автомобилларга экологик сертификат олиш эндиликда талаб қилинмаслигини айтишди, яъни аввалги ҳолатга қайтди (аввал талаб қилинмас эди). Экологик сертификатсиз расмийлаштириш ишлари бошлаб юборилган», дея ёзди канал муаллифи.

Маълумот учун, Ўзбекистонга электромобиллар ва гибрид автомобиллар асосан Хитойдан импорт қилинади. Ушбу мамлакатда 2018 йилдан бошлаб ишлаб чиқарилаётган барча автомобилларнинг Хитой-5 эмиссия стандартига мос бўлиши талаби кучга кирган. Бу стандарт талаблари Евро-5 билан қарийб бир хил. Кейинроқ талаблар кучайтирилиб, 2021 йилдан эътиборан Хитой-6а, 2023 йилдан эса Хитой-6б стандарти жорий этилган.

Аввалроқ, Олий Мажлис Сенати баёнот бериб, бу масалада экология вазирига сўров юборилганини маълум қилганди. Таъкидланишича, мазкур мавзу муҳокамаларга сабаб бўлгани бежиз эмас, чунки Ўзбекистонга кириб келаётган гибрид электромобиллар Евро-5 ёки Евро-6 экологик стандартларига жавоб берадиган электродвигателлар билан жиҳозланган.

Эслатиб ўтамиз, ўтган йили 1 ноябрдан эътиборан якка тартибда олиб кирилган автомобиллар учун Пискентдаги лабораторияда мажбурий электромагнит мослашувчанлик текшируви жорий этилганди. Кейинроқ Leapmotor автомобилларидан бири бу текширувдан ўта олмагани важи билан бу брендга мансуб барча автомобиллар импорти вақтинча тўхтатиб қўйилганди.

Жорий йил 1 майдан эса янги электромобиллар учун утилизация йиғими миқдори 4 баробарга оширилди.