Путин Шавкат Мирзиёевни Александр Невский ордени билан тақдирлади

Россия президенти Владимир Путин Ўзбекистон президенти Шавкат Мирзиёевни Александр Невский ордени билан тақдирлади. Бу ҳақда РИА «Новости» хабар бермоқда.

Фото: Президент матбуот хизмати

Владимир Путин томонидан имзоланган ҳужжат матнига кўра, Шавкат Мирзиёев Ўзбекистон ва Россия ўртасидаги дўстлик ва ҳамкорликни мустаҳкамлашга қўшган катта ҳиссаси учун орден билан тақдирланди.

Александр Невский ордени Россия Федерациясининг давлат мукофоти ҳисобланади.

Александр Невский ордени — бу Россия империяси, Совет Иттифоқи ва Россия Федерациясининг мукофот тизимларида (маълум ўзгаришлар билан) мавжуд бўлган ягона мукофотдир.

Россия президенти Дмитрий Медведевнинг 2010 йилдаги “Россия Федерациясининг давлат мукофотлари тизимини такомиллаштириш чора-тадбирлари тўғрисида”ги фармони билан Александр Невский ордени Россия давлат мукофотлари тизимига киритилгани белгиланди.

Маълумот учун, 2021 йил январ ойида Россия президенти Владимир Путин собиқ иттифоқ ва ўзбек дипломати Рафиқ Нишоновни Александр Невский ордени билан мукофотлаш ҳақидаги фармонни имзолаганди.

Тайёрлаган: Отабек Матназаров

#Владимир Путин #орден #Шавкат Мирзиёев