Норвегияда учратилган дельфин Россия махсус хизматлари билан алоқадорликда гумон қилинди

Фото: Twitter / Fiskeridirektoratet

Норвегиялик балиқчилар Баренц денгизида танасига GoPro камераси маҳкамланган белуха дельфинини учратишди.

Балиқчилардан бирининг айтишича, дельфин қайиққа сузиб келган. Дельфин танасида камар ва унга маҳкамланган камера бўлган. Таъкидланишича, денгиз жонзоти одамлардан қўрқмаган ва ўзини силашга ижозат берган. Балиқчилар дельфиндан камарни ечиб олишга ҳаракат қилишган, бироқ у маҳкам тортилгани сабабли уни эртаси куни мутахассислар ёрдамида ечиб олишга муваффақ бўлинган.

Маълум қилинишича, камарда “Оборудование Санкт-Петербурга” (Санкт-Петербург қурилмаси) ёзуви бўлган.

Балиқчилар томонидан чақиртирилган мутахассислар дельфиндан камарни ечиб олишган ва денгиз жонзоти Россия ҳарбий-денгиз флоти мутахассислари томонидан разведка вазифаларини бажариш учун махсус ўргатилган бўлиши мумкинлигини айтишган.

Уларнинг фикрича, дельфин Россиядан сузиб келган бўлиши мумкин. Биолог Мартин Биювнинг таъкидлашича, дельфинлар бундай белгиланмайди. У камера дельфин танасига россиялик ҳарбийлар томонидан маҳкамлаб қўйилган бўлиши мумкинлигини айтган.

Бошқа бир мутахассис, профессор Ойдин Рикардсеннинг таъкидлашича, дельфин Россия флотининг Мурманскдаги базасидан сузиб кетган бўлиши мумкин.

Тайёрлаган: Шуҳрат Раҳимов

#Норвегия #дельфин #белуха