Буюк Британия Скрипаль иши доирасида БМТ Хавфсизлик кенгаши йиғилишини чақиради

Буюк Британия ГРУнинг собиқ полковниги Сергей Скрипалнинг заҳарланиши билан боғлиқ воқеа юзасидан БМТ Хавфсизлик кенгашининг навбатдан ташқари шошилинч йиғилишини чақиради. Бу ҳақда Бирлашган қиролликнинг Ташқи ишлар вазирлиги твиттерида маълум қилинган.

«Буюк Британия БМТ Хавфсизлик кенгашининг шошилинч йиғилишини чақиради, кенгаш аъзолари Солсберида асаб тизимини фалаж қилувчи кимёвий модда билан ҳужум уюштирилгани ҳақида хабардор қилинади», дейилган вазирлик хабарномасида.

12 март куни Буюк Британия бош вазири Тереза Мэй Россияни Скрипаль ва унинг ҳаётига уюштирилган суиқасдда айблаб чиққанди. У бу ҳодисани «Бошқа давлат кучлари Буюк Британия ҳудудида ноқонуний равишда қўлланиши» деб баҳолаганди. Унинг маълумотига кўра, Скрипаль Россияда ишлаб чиқарилган «Новичок» номли модда билан заҳарланган. Вазир Россияга бу борада изоҳ бериш учун бир кун муҳлат берганди.

Россия томони айбловларни рад этди. Россия ТИВ раҳбари Сергей Лавров Москва бу суиқасдга алоқадор эмаслигини маълум қилди. У шунингдек, Россия Буюк Британиядан Солсберидаги воқеа юзасидан сўров олмаганини таъкидлади.