Nissan’нинг ҳайдовчисиз таксилари синовдан ўтказила бошланади

Nissan автомобилсозлик компаниясининг маълум қилишича, компания яқин орада ўзининг ҳайдовчисиз таксиси ва Easy Ride сервисини синовдан ўтказа бошлайди. Сервис учун дастурни Pokemon Go ўйини ва геолокацияни қўллашга асосланган бошқа лойиҳаларни яратгани билан маълум бўлган DeNA компанияси ишлаб чиққан.   

Хизматдан Япониянинг Иокогама шаҳри аҳолиси фойдалана олади. Улар 5 мартдан бошлаб ҳайдовчисиз таксида Nissan’нинг бош қароргоҳидан Yokohama World Porters савдо марказигача сайр қила олишади. 

Маълум қилинишича, сафар чоғида йўловчилар Easy Ride дастурини баҳолаб, унинг турли функцияларини синовдан ўтказишлари мумкин бўлади. Дастур овозли ва матнли буйруқларни тушуна олади ва шу сабабли автомобилга айни вақтда нима қилиш кераклигини буюриб, қулай ҳаракатланиш мумкин. Машина ўзи мусиқа ёқади ёки мижозни супермаркетдаги (гап Yokohama World Porters ҳақида кетмоқда) чегирмалар ҳақида хабардор қилади. Бундан ташқари, дастур сафарларнинг нархини ҳисоблай олади. 

Автопилот ва дастур яратувчиларининг айтишича, синов даври бир неча ҳафта давом этади. Бу вақт ичида зарур маъълумот тўпланиши кўзда тутилмоқда. Бу маълумотлардан бошқа синовларни ўтказишда ва дастурий таъминотни такомиллаштиришда фойдаланиш мумкин бўлади. Nissan такси хизматини 2020 йилгача – Токиода ёзги Олимпиадагача йўлга қўйишга умид қилмоқда.