Саакашвили Луганск полицияси собиқ бошлиғининг уйида ушланган 

Украина миллий полициясининг Луганск области бўйича бош бошқармаси собиқ бошлиғи Юрий Покиньбороданинг маълум қилишича, Одесса области собиқ губернатори Михаил Саакашвилини унинг квартирасида қўлга олишган. Бу ҳақда у ўз видеомурожаатида хабар берди, деб маълум қилмоқда «112 Украина» телеканали.

«У [Саакашвили] касал бўлиб қолди. Унга оддий тиббий ёрдам керак эди. Бизда уни қаерга олиб бориш бўйича бош қотириб ўтиришга вақт йўқ эди. Шифохонага олиб бора олмасдик. Биз уни менинг уйимга олиб келдик ҳамда шу ерда тиббий ёрдам кўрсатилди», - дея айтиб ўтди Покиньборода.

Унинг сўзларига кўра, «шундай ҳолат юз бердики, биз буни охиригача сир сақлай олмадик».

Покиньбороданинг таъкидлашича, «унинг бу ерда эканини билган маълум бир одамлар бўлган».

Аввалроқ Грузиянинг собиқ президенти Михаил Саакашвили 8 декабрь кечки пайт Киевда қўлга олиниб, вақтинчалик сақлаш изоляторига жойлаштирилгани хабар берилганди.