ЯТТларга заргарлик буюмларини сотишга рухсат берилади

2025 йил 1 сентябрдан бошлаб, заргарлик буюмлари савдоси билан шуғулланиш учун юридик шахс очиш шарт бўлмайди: якка тартибдаги тадбиркорларга бу фаолият тури билан шуғулланишга рухсат берилади. Шунингдек, қимматбаҳо металларга оид ҳуқуқбузарликлар тўғрисида хабар берган шахслар рағбатлантирилади.

Фото: Сергей Пятаков

«Заргарлик буюмларини ишлаб чиқариш соҳасини қўллаб-қувватлаш бўйича қўшимча чора тадбирлар тўғрисида»ги президент қарори қабул қилинди.

Қарорга кўра, 2026 йил 1 январдан қуйидагилар бекор қилинади:

- қимматбаҳо металлар ва қимматбаҳо тошлардан ишлаб чиқарилган заргарлик буюмлари ва ярим тайёр маҳсулотларни реализация қилиш бўйича айланмани ҚҚСдан озод қилишга оид имтиёз;

- олтиндан ясалган заргарлик буюмларини чакана савдода сотганлик учун йиғим.

2028 йил 1 январгача заргарлик буюмларини ишлаб чиқариш ёки уларни сотиш фаолияти билан шуғулланувчи тадбиркорларга ҚҚС 80 фоизи ҳар ойнинг 25-санасигача автоматик равишда республика бюджетидан қайтарилади.

2025 йил 1 сентябрдан:

- Якка тартибдаги тадбиркорларга заргарлик буюмларини сотиш фаолияти билан шуғулланишга рухсат берилади;

- Давлат асиллик даражаси назорати инспекцияси томонидан Тошкент ва Нукус шаҳарлари ҳамда вилоятлар марказларида заргарлик буюмларининг асиллик даражасини текшириш ва уларни тамғалаш бўйича сайёр хизмат кўрсатиш йўлга қўйилади;

- қимматбаҳо металлар ва қимматбаҳо тошлар тўғрисидаги ҳуқуқбузарликлар тўғрисида «Soliq» мобил иловаси орқали хабар берган шахсларга ундирилган жарима миқдорининг 50 фоизи миқдорида мукофот тўланади.

Тайёрлаган: Сардор Юсупов

#тадбиркор #заргарлик #ЯТТ #қимматбаҳо металл