«Украина можароси кутилганидан эртароқ музлатилиши мумкин» – Полша бош вазири

Полша бош вазири Доналд Туск Украина президенти Володимир Зеленский билан суҳбатдан сўнг шундай деди: «Муайян сигналлар бор ва менда шундай ҳиссиёт борки, можаронинг музлатилиши – мен уруш тугаши ҳақида гапирмаяпман, фақат можаронинг музлатилиши – кейинроқ эмас, балки эртароқ содир бўлиши мумкин».

Тускнинг сўзларига кўра, Зеленский суҳбат чоғида «жуда эҳтиёткор, лекин барибир оптимист» бўлган. Полша ҳукумати раҳбари қўшимча қилишича, Украина бўлғуси келишувда Европа давлатлари иштирок этишидан манфаатдор. Зеленский ўзининг ижтимоий тармоқдаги саҳифасида Туск билан суҳбатлашгани ҳақида ёзди, бироқ ҳеч қандай тафсилотларни ошкор қилмади.

7 август куни Украина президенти Германия канцлери Фридрих Мерц, Франция президенти Эммануэл Макрон, Еврокомиссия раҳбари Урсула фон дер Ляйен ва Европанинг бошқа етакчилари билан телефон орқали мулоқот қилди. Улар суҳбат якунлари бўйича ижтимоий тармоқлар ёки матбуот хизматлари орқали қисқача изоҳлар билан чекланган – уларда Европадагилар Украинани тўлиқ қўллаб-қувватлашда давом этиши ҳамда Доналд Трампнинг воситачилик ҳаракатларини қадрлаши айтилади. Евроиттифоқнинг ташқи ишлар бўйича комиссари Анитта Ҳиппер эса шундай деган: «Россия қандайдир тинчликдан манфаатдор эмаслиги яққол кўриниб турибди».

Трамп 6 август куни Европа етакчиларига қўнғироқ қилиб, уларга ўзининг махсус вакили Стивен Уиткоффнинг Москвага сафари якунлари ҳақида гапириб берганди. Бугун The Washington Post газетаси Европадаги юқори мартабали амалдорга таяниб, Трампнинг Владимир Путин билан учрашуви тайёрланаётганидан хабар топгач, Европа «саросимага тушгани» ҳақида ёзди. «Шунча мақтанчоқликдан кейин Трамп Путинга заррача босим ўтказмади. Ҳозирча шундай. Нол, ҳеч нарса», – деган нашр суҳбатдоши.

Шу билан бирга, Украинадаги юқори мартабали мулозимлардан бири аноним тарзда анча оптимистлик билан фикр билдирган. Унинг сўзларига кўра, агар биринчи қадам сифатида қуруқликдаги сулҳсиз, ҳаво ҳужумларини тўхтатишга эришилишининг ўзи ҳам «яхши натижа бўларди». Шу билан бирга, ҳаво ҳужумларини тўхтатиш ҳақидаги гаплар Россиянинг фақат Трампни тинчлантиришга қаратилган тактикаси бўлиши мумкинлигини тан олган. «Биз барча нодавлат каналлар орқали Россия келишувга интилаётгани ҳақида сигналлар эшитмоқдамиз. Бироқ, томонлар ўртасидаги ишончга бутунлай путур етиб бўлган», – дейди The Washington Post нашрининг украиналик суҳбатдоши.