Янги Chevrolet Aveo тақдим қилинди

Мексикада 2018 йилги модел қаторидан ўрин олган янги Chevrolet Aveo модели тақдим қилинди. Тан олиш керакки, моҳиятан бу модел 2015 йилги Chevrolet Sail седанининг бироз ўзгартирилган кўринишидир. У Мексика бозорига Aveo бренди остида чиқарилмоқда. Айни вақтда Chevrolet Sail Хитой ва Жанубий Америкада сотилади.

Шимолий Америка учун мўлжалланган Aveo модели Sail’дан туманга қарши чироқлари атрофидаги хромланган ҳошиялар ва салони безагининг баъзи унсурлари билангина фарқланади.

Седан капоти остида 1,5 литрли, 107 от кучига эга двигатель ўрнатилган. Машинанинг узатмалар қутиси 6 поғонали механик ёки 6 тезликли автомат кўринишида.

Машина 4 та хавфсизлик ёстиқчаси, электр приводли ва иситиш тизимига эга ташқи ойналар, кондиционер, электр люк, парковка датчиклари билан жиҳозланган.

Маълум қилинишича, автомобиль нархи 199 900 песони ( тахминан 10 минг доллар) ташкил қилади. Янги машина январь ойидан сотувга чиқарилиши режалаштирилган.

Ҳозирда Мексикада Chevrolet Sonic  ва Chevrolet Aveo T250 моделлари сотилади.