Испаниядаги халқаро конференцияда Ўзбекистон нефть ва газ соҳаси имкониятлари намойиш этилди

Испаниянинг Бильбао шаҳридаги «Нефть ва газ» йирик халқаро конференциясида Ўзбекистон Республикасининг Испания Қироллигидаги элчихонаси томонидан Ўзбекистоннинг нефть ва газ соҳасининг инвестицион салоҳияти намойиш этилди. Бу ҳақда Kun.uz мухбирига Ўзбекистоннинг Испаниядаги элчихонаси иккинчи котиби Н.Қувондиқов маълумот берди.

«Нефть ва газ» йирик халқаро конференцияси Бильбао шаҳридаги кўргазмалар марказида ҳар икки йилда бир марта ташкиллаштирилади. Мазкур халқаро тадбирда жаҳоннинг нефть ва газ соҳасидаги етакчи компаниялари раҳбарлари ва вакиллари, шунингдек, хорижий илмий тадқиқот марказларининг олимлари ва экспертлари иштирок этишади.

Элчихона томонидан ўтказилган тақдимотнинг мақсади — тадбир иштирокчиларини «Ўзбекнефтегаз» МХК фаолияти билан таништириш, нефть ва газ соҳасида хорижий ҳамкорлар билан амалга оширилаётган инвестицион лойиҳаларни намойиш этиш, шунингдек, Ўзбекистоннинг нефть ва газ соҳасига Испаниянинг етакчи компаниялари инвестициялари ва технологияларини жалб этиш учун алоқалар ўрнатишдир.

Тақдимот давомида «Ўзбекнефтгаз» МХКнинг хорижий ҳамкорлар билан амалга оширган инвестицион лойиҳалари, жумладан, «Шўртангаз» ва «Устюрт» газ-кимё комплекслари, шунингдек, амалга оширилаётган «Uzbekistan Gas-to-liquid», «Шўртангаз» газ-кимё мажмуасини реконструкция қилиш», «Kandym Group» билан биргаликда «Газни қайта ишлаш замонавий заводини қуриш» каби янги инвестицион лойиҳалар ҳақида батафсил маълумотлар берилди.

Потенциал инвесторларга Сурхондарё ва Жиззах вилояти ҳудудларида газ ва нефтни қидирув, қазиб олиш ва қайта ишлаш бўйича асосий лойиҳалар, Ўзбекистон газтранспорт тизимини модернизация қилиш ҳақида маълумотлар тақдим этилди.

Тақдимот Испания компанияларида қизиқиш уйғотган ва улар «Ўзбекнефтгаз» МХК билан алоқа ўрнатишга тайёр эканликларини билдиришган.

Испаниянинг «IDOM» инжиниринг компанияси техник масалалар бўйича директори Х.Латаса шундай деган: «Ўзбекистон томонининг нефть ва газ соҳасидаги инвестицион имкониятларга тааллуқли тақдимотлари, шунингдек мамлакатда бизнес юритиш учун янги имкониятлар ва қулай шарт-шароитлар тўғрисидаги ахборотлар бизни жуда қизиқтириб қолди. Биз яқин ойларда мамлакатингизга республиканинг нефть ва газ компаниялари билан икки томонлама ҳамкорлик истиқболларини муҳокама этиш учун борамиз».