Украинада қулликда ушлаб турилган ўзбекистонликлар озод қилинди

Ўзбекистоннинг 13 нафар фуқароси Киев вилоятида қулликда сақланган: меҳнатга мажбурланиб, ҳаракат эркинлиги чекланган. Ноқонуний эксплуатация схемасини ташкил қилганлар қўлга олингани таъкидланмоқда.

Украинанинг Киев вилоятида ўзбекистонлик «қуллар» сақланаётган жой топилди. Схеманинг 4 нафар ташкилотчиси суд қилинади, деб хабар берди Киев вилояти прокуратурасига таяниб ТСН.

Қайд этилишича, Киев яқинида Хитойнинг икки фуқароси, Ўзбекистон фуқароси ва украиналик аёл одамларни ноқонуний эксплуатация қилиш схемасини ташкил қилган. Улар қўлга олинган.

Эҳтимолий қурбонлар чет элда қидирилган ва Украинага олиб кетилган. Бу ерда уларни фойда олиш мақсадида мажбурий меҳнат кутарди. Лекин пулни, албатта, ишчилар эмас, уларнинг «хўжайинлари» олган.

«Тергов маълумотларига кўра, гумонланувчилар уй-жой, иш ва оғир моддий шароитлар йўқлиги сабабли оғир аҳволда қолган шахсларни мажбурлаш ва алдаш йўли билан қулликка жалб қилган», дейилади хабарда.

Қуллар назоратда сақланган, ишга мажбур қилинган ва ҳаракат эркинлиги чекланган.

«Одамлар ҳаддан ташқари камситилган: ҳатто ҳожатхонага боришга ҳам фақат белгиланган жадвал бўйича рухсат берилган, арзимаган қоидабузарлик учун жарима солинган», дейилади хабарда.

Ҳуқуқ-тартибот идоралари ходимлари жиноятчиларнинг яшаш жойи ва хўжалик объектларини топди. Хусусан, у ерда 13 нафар Ўзбекистон фуқароси ғайриинсоний шароитларда сақланган хоналар аниқланди. Воқеа жойидан ҳужжатлар, пул ва транспорт воситалари топилди.

Қўлга олинганларнинг 4 нафари ўта оғир жиноят содир этганликда гумон қилинмоқда, уларга нисбатан эҳтиёт чораси кўриш масаласи ҳал этилмоқда.