АҚШ Украинага ваъда қилинган 20 мингта ракетани Яқин Шарққа юборди — Зеленский

Володимир Зеленский Украина «Шаҳед» туридаги дронларга қарши кураш учун 20 мингта ракета олиши керак бўлганини айтди. Украина учун мўлжалланган ушбу ракеталарни топшириш тўғрисидаги қарор Жо Байден президентлиги даврида қабул қилинган, аммо Трамп президент этиб сайлангач, ракеталар Яқин Шарққа юборилган. Бу ҳақда Зеленский ABC News’га берган интервюсида маълум қилди.

«Дарвоқе, биласизми, бизда «Шаҳед» ва шунга ўхшаш дронлар билан катта муаммоларимиз борлигини кўргансиз. Биз бунга қарши курашяпмиз ва, албатта, уларни йўқ қилиш учун барча воситаларни топамиз», — дея таъкидлаган Зеленский.

Шу билан бирга, Украина президенти Жо Байден президентлиги даврида, мудофаа вазири Ллойд Остин иштирокида бир лойиҳани амалга ошириш бўйича қарор қабул қилингани ҳақида ҳам гапирди.

«Ва биз ушбу лойиҳага умид қилгандик. «Шаҳед»ларга қарши кураш учун 20 мингта ракета — бу қиммат эмас, аммо муҳим технология. Шунинг учун биз шу 20 минг ракетага таянаётган эдик. Бугун эрталаб мудофаа вазирим менга айтдики, Қўшма Штатлар уларни Яқин Шарққа юборибди», — дея қўшимча қилади Зеленский.

2022 йил кузидан бошлаб Россия-Украина урушида янги муҳим фактор — Эроннинг «Шаҳед» дронлари пайдо бўлди. «Шаҳед»нинг асосий афзаллиги автоном тарзда катта масофани учиб ўтиши ва белгиланган нишонга аниқ зарба беришидир. Дроннинг жанговар қисмида нишонни йўқ қилиш учун портловчи модда мавжуд («Шаҳед-136»да тахминан 40 кг, «Шаҳед-131»да эса 10 кг).

Ушбу мослама ўлчамлари жиҳатидан жуда кичик: узунлиги 3,5 метр, оғирлиги эса 200 килограммгача. Дрон деярли 2 минг километр масофага уча олади. Бироқ дроннинг поршенли двигатели баланд овозда ишлайди, шунинг учун у украиналиклар орасида «мопед» лақабини олган.