Соғлом бўлишнинг «дориси»ни топган 101 ёшли Пирназар бобо. У ҳамон томорқада меҳнат қилади

Эрта баҳордан кетмонини олиб, ерга ўзи ишлов беради. Рўзғорга керакли маҳсулотларни экиб, етиштиради. 101 ёшли бобонинг ғайрати йигитларникидан кам эмас.

«Картошкани 15 февралда экувдик. Бола-чақа ейишга муяссар бўлсин дейман-да. 30 тупга яқин анор, 15 туп анжир дарахтим бор. Совуқ урмаслиги учун қишда уларни кўмамиз. Яқинда уларни очдим. Олма, ўрик, гилос, қароли дарахтларим ҳам бор. Шуларга қарайман.

Ерни ағдариб, нури солиб, экишга тайёрлаб бераман. Соғлом бўлишнинг «дориси» – меҳнат. Одам меҳнат қилса, чидамли бўлади», – дейди Пирназар бобо.

Карманалик ижодкор, бобонинг жияни Шойим Шерназарнинг маълум қилишича, Пирназар бобо ёшлигида бақувват йигит бўлган. Мактабдан қайтаётганда НКВДнинг ходимлари кўриб қолиб, олиб кетишган ва урушга жўнатиб юборишган экан.

Пирназар бобо Сталинград, Украина, Беларус, Полша, Германиядаги жангларда иштирок этган. Урушдан кейин эса 40 йил хўжаликда темирчи бўлиб ишлаган.

Бугун бобонинг 2 фарзанди, 8 нафар невараси, 16 нафар чевараси ҳамда 4 нафар эвараси бор. Пирназар бобо уларни ҳам доим меҳнат қилишга ундаб келади.