Меҳнатга ҳақ тўлашнинг ягона тариф сеткаси қайта кўриб чиқилади

Ўзбекистон Республикаси президенти “Меҳнатга ҳақ тўлаш, пенсиялар ва бошқа тўловлар миқдорларини аниқлаш тартибини такомиллаштириш тўғрисида”ги фармонни имзолагани хабар берилганди.

2019 йил 1 сентябрдан бошлаб иш ҳақининг энг кам миқдори ўрнига:

577 170 сўм миқдорида меҳнатга ҳақ тўлашнинг энг кам миқдори;
202 730 сўм миқдорида базавий ҳисоблаш миқдори;
202 730 сўм миқдорида пенсияни ҳисоблашнинг базавий миқдори жорий этилди.

Белгиланишича:

энг кам иш ҳақига нисбатан белгиланган устамалар, қўшимча ҳақ, мукофотлар ҳамда бошқа компенсация ва рағбатлантирувчи тусдаги тўловларнинг барча турлари мазкур тўловларнинг сўмда ифодаланган амалдаги миқдорларини сақлаб қолган ҳолда қайта ҳисоб-китоб қилинади (зарур ҳолларда кўп томонга яхлитланади);

қонун ҳужжатларида меҳнатга ҳақ тўлаш, пенсиялар ва бошқа тўловлар миқдорларини аниқлашнинг бошқа тартиби ўрнатилиши мумкин.

Ўзбекистон Республикаси Бандлик ва меҳнат муносабатлари вазирлиги Молия вазирлиги ва Адлия вазирлиги билан биргаликда икки ой муддатда:

Меҳнатга ҳақ тўлашнинг ягона тариф сеткасини қайта кўриб чиқиш ҳамда нафақалар, компенсациялар ва тўловларнинг алоҳида турлари миқдорларини мутлақ суммада белгилаш бўйича Ўзбекистон Республикаси Вазирлар Маҳкамасига таклифлар киритади;

мазкур Фармон талабларидан келиб чиққан ҳолда Меҳнатга ҳақ тўлашнинг ягона тариф сеткасини қўллаш ҳамда ташкилотларда меҳнатга соатбай ҳақ тўлаш тизимини белгилаш бўйича методик тавсияларни ишлаб чиқади ва тасдиқлайди.