Нима учун Америкада янги туғилган ўғил болаларнинг ярмидан кўпи хатна қилинган?

Бутун Ғарб бўйлаб соғломлаштириш ва эстетик нормалар у қадар катта фарқ қилмайди. Бироқ ўғил болаларнинг хатна қилиниши бундан истисно. The Economist нашрида келтирилишича, Америкада туғилган ўғил болаларнинг ярмидан кўпи хатна қилинган, Финляндия ёки Буюк Британияда эса бу кўрсаткич 2-3 фоизни ташкил қилади. Америкада бу жараён соғлиқ учун фойдали ҳисобланади. 

Хатна қилиш Ғарб мамлакатларида XIX аср охирига келиб кенг тарқала бошланди. У гўёки бош оғриғидан то сил касаллигигача бўлган саломатлик билан боғлиқ муаммоларнинг олдини олади, деб ҳисобланган. Иккинчи жаҳон урушидан кейин хатна қилиш Америкада гигиена билан боғланган ва айрим ҳолатларда бадавлатлик белгиси ҳисобланган. 

Бугунга келиб америкалик ўғил болаларнинг 80 фоиздан зиёди хатна қилинган. Ота-оналар ўқув даргоҳларидаги ечиниш хоналарида хатна қилинмаган ўғил болаларнинг устидан кулишларидан хавотирдалар, шунинг учун оталар фарзандлари бошқалардан қолишмаслиги учун хатна қилдиришади. 

Америкалик шифокорлар янги фарзандни дунёга келтирган оналарга уйга қайтишдан аввал ўғилларини хатна қилишни таклиф қилишади. Суғуртачилар ҳатто бунинг учун пул ҳам тўлашади, шундай экан, талабгорлар етарлича. Америка педиатрия академиясида таъкидланишича, хатна қилишнинг хавфидан кўра афзаллик томонлари кўп. Шунинг учун аксарият ота-оналар ўғилларини хатна қилдириш тарафдори. 

Европа шифокорлар ассоциацияси бошқача нуқтаи назар тарафдори. Шимолдагилар хатна қилишнинг ўғил болалар соғлиғига фойдаси йўқ дея таъкидлашади. Улар бу жараённи боланинг жисмоний саломатлигига зиён етказиш деб қарашади.