Доналд Трамп учинчи жаҳон уруши хавфи ҳақида огоҳлантирди

АҚШ президенти Доналд Трамп учинчи жаҳон уруши бошланиш хавфи борлигини айтиб, буни Украина атрофидаги вазият билан боғлади. Унинг огоҳлантиришича, бу контекстдаги «ўйинлар» глобал можарога олиб келиши мумкин.

«Мен аввалроқ айтдим: агар ҳамма бундай ўйинларни ўйнашда давом этса, учинчи жаҳон уруши билан тугайди. Биз бундай бўлишини истамаймиз», деди АҚШ президенти журналистларга.

Трампнинг таъкидлашича, АҚШ можарода тўғридан-тўғри иштирок этмаяпти, фақат музокаралар жараёни билан чекланмоқда. Шу билан бирга, у Украина ва Европа давлатлари Вашингтонни вазиятни ҳал қилишга фаол жалб қилишдан манфаатдор эканини таъкидлади. Президент сўзларига кўра, Қўшма Штатлар НАТО давлатларини қурол-яроғ билан таъминлайди, бу эса кейинчалик Украинага бориб тақалади.

АҚШ президентининг айтишича, аввалроқ у Россия ва Украина ўртасида келишув тузиш имкониятини яқин деб ҳисоблаган, бироқ ҳудудий масалалар бўйича келишмовчиликлар бунга жиддий тўсиқ бўлган. У бу музокараларни «1000 га кўпайтирилган мураккаб кўчмас мулк савдоси» деб таърифлади. Шунингдек, у таклиф қилинган тинчлик режасидан бандлардан бири чиқариб ташланганини маълум қилди. Унинг сўзларига кўра, келишув концепцияси Украина президенти Володимир Зеленский ва Украина халқига маъқул келган.