Запорижжяда кўп қаватли уйга ракета келиб урилди (видео)

«Россияликлар Запорижжяни ўққа тутишди. Турар жой биноси, шунингдек Хортица ороли душман зарбаси остида қолди», дея ёзган Украина президенти офиси раҳбари Андрей Ермак ўз телеграм-каналида.

Маҳаллий нашрлар ва телеграм-каналлар зарба видеоси ва фотоларни тарқатишган, бу кадрларда тўққиз қаватли уйда чиққан ёнғин ва вайронгарчиликларни кўриш мумкин. Украина президенти Володимир Зеленский ҳам кучли портлаш видеосини намойиш этган.

«Запорижжя. Ҳозиргина россияликлар ракетаси кўп қаватли уйга келиб урилди. Россия шаҳарни ваҳшийларча ўққа тутди. Оддий одамлар, болалар яшайдиган турар жойлар кварталига тўғридан тўғри зарба берилди. Террорчи мамлакат бизнинг шаҳарларимиз, бизнинг давлатимиз, бизнинг одамларимизни йўқ қилмоқчи. «Украинада, Европа ёки дунёнинг бошқа жойларида «шунчаки оддий кун» бўлиб қолмаслиги керак», деган Зеленский.

Запорижжя области ҳарбий маъмурияти россияликларнинг иккита ракетаси кўп қаватли турар жой биносига урилганини хабар қилиб, буни кўп минг киши истиқомат қиладиган шаҳарда амалга оширилган навбатдаги ҳарбий жиноят деб атаган. Украина ҳукумати атрофда ҳеч қандай ҳарбий нишон бўлмаганини қайд этган.

Запорижжя шаҳар кенгаши котиби Анатолий Куртевнинг аниқлик киритишича, зарбадан бир эмас, икки бино шикастланган. Ҳовлидан туриб олинган фотоларда ҳам икки бинода зарба оқибатларини кўриш мумкин.

Куртевнинг хабар қилишича, бир киши ҳалок бўлган, 25 киши шифохонага ётқизилган, улардан уч нафари оғир аҳволда. Унинг маълумотига кўра, жабрланганлардан икки нафари етти ва тўққиз ёшли болалар.

{Yii::t(}

Ўтказиб юбориш 6s

Ўтказиб юбориш

Россия мудофаа вазирлиги ҳозирча Запорижжядаги турар жой биносига россияликлар ракетаси урилгани юзасидан изоҳ бермади. Запорижжя областининг бир қисми ўтган йили босиб олинган, лекин област маркази Украина назоратида қолган.

BBC News Украина мухбири Олег Притикин тўққиз қаватли бинога катта эҳтимол билан С-300 ракетаси урилган деган фикрда. Украина ҳаво ҳужумидан мудофаа кучлари амалда С-300 ракеталарини уриб туширишга қодир эмас.

Притикиннинг сўзларига кўра, икки подъезд шикастланган. «Бу деярли марказ ҳудуд, у ерда ҳозирда ҳодиса оқибатларини бартараф этишмоқда. Жуда кўп «тез ёрдам» машиналари тўпланган, автотранспорт ҳаракати чекланган», деган у.

Бундан аввалроқ шаҳарда ҳаво тревогаси янграганди. Запорижжя шаҳри маъмурияти аҳолидан тревога тугагунча хавфсиз жойларда қолишни ва ижтимоий тармоққа фото ва видеолар жойламасликни сўраган.

Журналистнинг сўзларига кўра, шаҳарда ўнга яқин портлаш овозлари эшитилган.

Чоршанбага ўтар кечаси Украинанинг қатор регионлари, жумладан Киев области Shahed-136 дронларининг ёппа ҳужуми кузатилганди. Украина қуролли кучлари Бош штаби ҳаво ҳужумидан мудофаа тизими 21 дрондан 16 тасини уриб туширганини маълум қилган.

Тунги зарбалар оқибатида Киев областида камида тўрт киши ҳалок бўлган, 20 дан ортиқ киши яраланган. Ржишчев шаҳрида (Киевдан 64 км жанубда) икки ётоқхона биноси шикастланган - беш қаватли биноларнинг тўртинчи ва бешинчи қаватлари. Шунингдек, касб-ҳунар лицейининг уч қаватли ўқув корпуси шикастланган, бинода ёнғин чиққан.

Тунда Киев шаҳри, Киев области ва Украинанинг бошқа регионларида ҳаво тревогаси эълон қилинган. Киев ҳукумати ҳаво ҳужумидан мудофаа тизими ишлаётганини хабар қилган. Шунингдек, Житомир ва Хмельницкий областларида ҳам ҳаво ҳужумига қарши мудофаа тизимлари ишга тушган. Житомир областида ҳам инфратузилма объекти шикастланган.