Италияда Милан дербиси, Испанияда «Барса» Суаресга қарши. Ҳафта ўйинлари анонси

Қисқа танаффусдан сўнг, кучли бешлик чемпионатлари ҳам майдонга қайтмоқда. Шу билан март ойи охиригача айниқса, еврокубок иштирокчиси бўлган жамоалар жуда кўп ўйинларда қатнашадилар. Илк синовлар ҳам оддий эмас – Италияда Милан дербиси, Испанияда яна Каталония ва Мадрид тўқнашуви, Англияда эса ҳаёт-мамот ўйини.

5 февраль (шанба)

ИНТЕР – МИЛАН

Ўйин бошланиш вақти: 22:00

ТВ-трансляция: SportTV

Мана иккинчи йилдирки, Милан дербиси шунчаки тарихий мақом эмас, айни дамда турнир жадвалига, ҳатто чемпионлик курашига бевосита таъсир қиладиган тўқнашувлар сирасига кириб олди. Биринчи даврадаги ўйин олдидан «Интер» турнир жадвалининг учинчи поғонасида, «Милан» эса чемпионатни бошқариб турганди. Орадан уч ой этиб, энди тескари, «қизил-қоралар» учинчи ўринга тушиб кетган бўлсалар, Индзаги шогирдлари карвонбоши бўлиб олдилар.

Бу ўйин айниқса «Милан» учун муҳим, зеро жамоа ҳозир ҳамшаҳаридан бир ўйин кўп ўтказган ҳолда 4 очко ортда бормоқда. Яъни агар «Милан» мағлубиятга учрайдиган бўлса, қарийб ўн очкога ортда қолиб кетади. Бу фарқни йўққа чиқариш эса мавсумда атиги бир маротаба мағлубиятга учраган барқарор «Интер»га қарши деярли имконсиз бўлиб қолади. «Интер» охирги ва ягона маротаба октябрь ойида «Лацио»га сафарда мағлубиятга учраганди. «Милан» эса аксинчи, сўнгги ўйинларни муваффақиятсиз ўтказди. «Специя»га қарши ўйиндаги аламли мағлубиятдан сўнг, «Ювентус» билан дуранг содир бўлди.

Таркибдаги йўқотишларга келсак, «Интер»да Хоаким Корреадан бошқа жароҳатланганлар йўқ. Яқинда «Аталанта»дан трансфер қилинган Робин Госенс эса яқин кунларда тўлиқ тикланиши айтилмоқда, аммо ушбу ўйинда «заявка»дан четда қолса керак. Шунингдек, уч кун олдин Алексис Санчес Чили миллий жамоаси сафида Боливияга қарши майдонга тушди. Ҳужумчи Италияга қайтган бўлса-да, ўйингача тикланиб улгурмаса керак.

«Милан» сафида эса Фоде Балло Сенегал сафида Африка Миллатлар кубоги финалида майдонга тушади. Лекин у ҳозир Миланда бўлганида ҳам, асосий таркибда кутиш қийин эди, зеро Тео Эрнандес буткул соғайиб, сўнгги ўйинларда чап қанотни ўзиники қилиб улгурди. «Ювентус»га қарши ўйинни жароҳат туфайли эрта тарк этган Златан Ибраҳимович ҳам катта эҳтимол билан майдонга туша олмайди. Анте Ребичнинг ҳам майдонга тушиши сўроқ остида.

Мавсумдаги илк Милан дербиси дуранг билан якунланганди. Умуман олганда эса охирги ўттиз дербининг 13 тасида «Интер», 10 тасида «Милан» ғалаба қозонган. Охирги уч ўйинда «Милан» ғалаба қозона олмаяпти, сўнгги 11 ўйиндан эса атиги биттасида «Милан»нинг қўли баланд келган.

5 февраль (шанба)

БАВАРИЯ – ЛЕЙПЦИГ

Ўйин бошланиш вақти: 22:30

ТВ-трансляция: МатчТВ (Россия)

Нагельсман «Лейпциг»даги муваффақиятли йиллардан сўнг, жамоани тарк этгач, «редбулчилар»да муаммолар пайдо бўлди ва мавсум ўртасида мураббийни алмаштиришга ҳам мажбур бўлди. Қизиғи, «Лейпциг»нинг ҳозирги мураббийи Доминико Тедеско ҳам, «Бавария»ни бошқараётган Юлиан Нагелсьман ҳам мураббийлик дебютини «Ҳоффенҳайм» ёшлар клубида бошлашган. Худди «Лейпциг» сингари, Тедеско «Ҳоффенҳайм» ёшлар клубида Нагелсманнинг ишини давом эттирган. Мана шундай тариқа, бир мактаб мураббийлари ўзаро тактик курашга киришадилар.

Жамоаларнинг биринчи даврадаги ўйинида мюнхенликлар меҳмонда 4:1 ҳисобида устун келгандилар, лекин бу ўйин Тедеско келмасидан олдинроқ содир бўлган. Умуман жамоалар Бундеслига ва Германия кубоги доирасида жами 13 маротаба тўқнаш келганлар ва 7 ўйинда «Бавария» устун келган. Фақат бир маротаба, 2018 йилнинг мартида «Лейпциг» 2:1 ҳисобида устун келган. Ўша ўйинда мезбонлар сафида майдонга тушган Конате ва Кейта ҳозир «Ливерпуль»да, ғалаба голи муаллифи Тимо Вернер эса «Челси»га кетиб улгурди. Дайот Упамекано эса Нагельсман билан бирга «Бавария»га кўчиб ўтди ва бу сафар собиқ жамоасига қарши майдонга тушади.

«Лейпциг» турнир жадвалида анча пасайиб кетган бўлса-да, Тедеско вазиятни қисман ўнглай олди ва ҳозирда жамоа 31 очко билан 6-ўринни эгаллаб турибди. Тўртинчи ва бешинчи ўринларда «Унион Берлин» ва «Фрайбург» каби кутилмаган жамоалар турганини эътиборга олсак, «Лейпциг»да ҳеч бўлмаса, ЕЧЛ йўлланмасини берувчи ўринлардан бирини эгаллаш имконияти ёмон эмас. Жамоа Бундеслигада охирги 3 ўйинни ғалаба билан якунлади. «Бавария» эса олти очколик фарқ билан турнир жадвалини бошқариб турибди.

Жамоалар таркибидаги ҳолатга тўхталадиган бўлсак, мезбонлар сафида Буна Сарр Африка Миллатлар кубоги финалида ўйнайди, Шупо Мотингнинг Камеруни яримфиналда имкониятни бой берди. Бу икки футболчи жамоага ёрдам бера олмайди. Шунингдек, Горетска кейинги ҳафталарда таркибга қайтади, Альфонсо Дейвиснинг қайтиш пайти эса апрель ойида кутилмоқда.

5 февраль (шанба)

БЁРНЛИ – УОТФОРД

Ўйин бошланиш вақти: 23:00

ТВ-трансляция: UzReportTV

Ушбу ҳафтада АПЛ жамоалари Англия кубогининг навбатдаги босқичида майдонга тушади. Бу сафар ҳам қизиқ ўйинлар бор – «Тоттенҳэм»нинг «Брайтон» билан, «Эвертон»нинг эса «Брентфорд» билан ўйинлари шулар жумласидандир. Кулусевски, Донни ван де Бек, Деле Алли, Кристиан Эриксен каби футболчилар бу ўйинларда янги жамоа сафида дебют қилишлари мумкин. АПЛ доирасида эса биргина учрашув бўлиб ўтади ва бу ўйин ҳам мухлисларнинг назаридан четда қолмаслиги керак. Зеро АПЛда жон сақлаб қолиш учун курашаётган икки жамоанинг тўқнашуви анча шиддатли ва курашларга бой ўтиши шубҳасиз.

«Уотфорд» ва «Бёрнли» айни дамда турнир жадвалининг сўнгги поғоналарини эгаллаб турибдилар, лекин асосий рақибларга нисбатан «Уотфорд»да 1-2 та, «Бёрнли»да эса 3-4 та захира ўйини борлигини эътиборга олсак, ҳали ҳамма кураш олдинда.

Яна бир эътиборли жиҳат шундаки, «Уотфорд» мавсумда иккинчи марта ўз мураббийини истеъфога чиқарди. Раньери ўрнига Англияда яхшигина тажрибага эга бўлган Рой Ҳожсон тайинланди ва бу ўйинда ушбу мураббий дебют қилади. «Бёрнли» сафида ҳам янги ном бор – Ваутер Вегорст. Клуб асосий ҳужумчиларидан бири Крис Вудни «Ньюкасл»га 25 миллион фунтга сотгач, бу пулнинг ярмига Эрдивизия ва Бундеслигада жами 100 дан ортиқ гол урган ҳужумчини «Вольфсбург»дан трансфер қилди. Табиийки, унинг АПЛ даги дебюти ҳам мухлислар учун қизиқ бўлиши шубҳасиз.

«Бёрнли» 9 ўйиндан бери ғалаба нималигини билмаяпти ва жамоанинг АПЛдаги охирги ғалабаси октябрь ойида «Брентфорд» устидан бўлганди. Қизиғи, «Уотфорд»нинг ҳам 9 ўйиндан иборат ғалабасиз серияси бўлиб, охирги муваффақият ноябрь ойида «Манчестер Юнайтед» билан ўйинда содир бўлганди. Ушбу учрашув биринчи даврадаги қолдирилган ўйин бўлиб, жамоалар мавсумда илк бор тўқнаш келмоқдалар. «Уотфорд» ўтган мавсумни Чемпионшипда ўтказди, 2019/20 мавсумида эса ҳар икки ўйинда «Бёрнли»нинг қўли баланд келган.

Таркибларга келсак, ҳар икки жамоада ҳам дисквалификация туфайли майдонга туша олмайдиган футболчилар бор. Мезбонлардан Браунҳилл «Арсенал»га қарши ўйинда бешинчи сариқ карточкасини олганди, «Уотфорд» эса етакчи ҳужумчиси Эммануэль Денниссиз ўйнайди. Футболчи «Норвич»га қарши учрашувда ҳакам томонидан четлатилганди. Шунингдек, «Бёрнли» сафида Видра, Гудмундссон ва Тейлор, меҳмонлардан эса Нкулу ва Этеболарда жароҳатлар бор. «Уотфорд» вингери Исмоил Сарр эса юқорида эсланган «МЮ»га қарши ўйинда жароҳат олганди. У ҳозирда тикланиб улгурди, лекин Сенегал миллий жамоаси билан бирга Африка Миллатлар кубоги учун курашни давом эттирмоқда.

6 февраль (якшанба)

БОРУССИЯ ДОРТМУНД – БАЙЕР

Ўйин бошланиш вақти: 19:30

ТВ-трансляция: МатчТВ (Россия)

Ушбу мавсум Бундеслигада «Бавария»ни таъқиб қилиб, сал бўлса-да, интрига пайдо қилиши мумкин бўлган жамоа «Боруссия»дир. Бунинг учун дортмундликлар айниқса, мана шу ойни юқори савияда ўтказишлари керак. Чемпионат доирасида жамоа қаторасига «Байер», «Унион Берлин» ва Мёнхенгладбахнинг «Боруссия»сига қарши ўйинларда майдонга тушади. Ҳозирда пешқадамдан 6 очкога ортда бораётган «Боруссия» Д имкон қадар мана шу учрашувларда очко йўқотмаслиги шарт.

«Байер» эса дортмундикларни таъқиб қилиб бормоқда. Тўғри, Леверкузен жамоаси 2-ўриндан кўра, пастдаги жамоаларга яқинроқ. Шунинг учун ҳам «Байер» ғалаба учун ўйнайди, чунки мағлубият шу турдаёқ жамоани ҳатто бешинчи ўринга тушиб юбориш эҳтимоли бор.

«Боруссия» ва «Байер» ўртасидаги ўзаро ўйинлар айниқса, сўнгги пайтларда жуда қизиқарли ва томошабоп бўлмоқда. Шунчаки, сентябрь ойида бўлиб ўтган биринчи давра учрашувини эслаш кифоя. Ўшанда жуда кўп голлар урилган, ўйиннинг охирги чорагида мезбонлар, яъни «Байер» 3:2 ҳисобида олдинда борган, аммо Ҳоланд ва Геррейрунинг голлари «Боруссия»га ғалаба келтирганди. Умуман олганда, охирги 20 ўйиннинг 12тасида дортмундликларнинг қўли баланд келган. Мана шу даврда «Байер» ҳисобида 5 ғалаба бор.

«Боруссия» сафида катта йўқотиш албатта, Эрлинг Ҳоланддир. Ҳужумчи келаси ҳафталарга сафга қайтиши керак ва катта эҳтимол билан ушбу ўйинда майдонга туша олмайди. Акс ҳолда, биз Левандовскини тўпурарлар баҳсида таъқиб қилаётган икки яхши ҳужумчининг дуэлига гувоҳ бўлишимиз мумкин эди. Ҳоланд ва Патрик Шик. Шунингдек, Ҳуммельснинг ҳам касал экани айтилмоқда. Шмалцер эса машғулотларга қайтди ва балки учрашув қайдномасидан жой олиши мумкин. Меҳмонлар сафида эса жароҳат туфайли Лунев, Синкгравен, Паласиос, Баумгартлингерлар майдонга туша олишмайди. «Зенит»дан трансфер қилинган Сардор Озмун ҳам тўлиқ тикланиб улгурмаган. Эдмонд Тапсоба эса Буркино Фасо миллий жамоаси сафида Африка Миллатлар кубоги яримфиналигача етиб борди ва учинчи ўрин учун баҳсда Камерунга қарши майдонга тушади.

6 февраль (якшанба)

БАРСЕЛОНА – АТЛЕТИКО

Ўйин бошланиш вақти: 20:15

ТВ-трансляция: FutbolTV / UzReportTV

«Барселона»нинг ушбу ҳафтадаги ўйини рақибдан қатъи назар, алоҳида эътиборга молик, зеро клуб трансфер ойнасининг сўнгги кунларида бир қатор эътиборли харидларни амалга оширди. Адама Траоре ва Пьер Эмерик Обамеянг «Атлетико»га қарши ўйинда «Камп Ноу»да дебют қилишлари мумкин. Тўғри, Адама Траоре ўз вақтида «Ла Масия»да тарбияланган ва тўққиз йил олдин ҳатто майдонга тушган ҳам. Лекин тан олиш керак, у ҳар томонлама бошқа Траоре эди. Бу футболчилар Торрес, Эззазули, Депай, Брейтгуэйт каби футболчилар ҳам сафга қайтиб улгуришган – бу сафар Хавида ижобий маънода бошоғриғи бор деб, бемалол айта оламиз.

«Атлетико» эса Испания кубоги ва Суперкубогидаги мағлубиятлардан сўнг, «Валенсия»га қарши ўйинда ижобий ҳиссиётларни бошдан кечирди, ҳакам томонидан қўшиб берилган дақиқаларда камбэкни амалга оширди. Биринчи даврадаги «Барселона» устидан ишончли ғалаба ҳам Симеоне шогирдларига етарлича ишонч тақдим этса керак. Умуман олганда беш ўйиндан бери «Барселона» ушбу рақиби устидан ғалаба қозона олмаяпти, охирги уч ўйинда эса каталонияликлар ҳатто гол ҳам ура олишмаган.

Турнир жадвалида рақиблар ёнма-ён жойлашишган. Мезбонларда 21 ўйинда 35, «Атлетико»да шунча ўйиндан сўнг, 36 очко мавжуд. «Барселона» бу ўйинда ғалаба қозониш орқали топ-4га кириши, «Атлетико»ни эса у ердан чиқариб юбориши мумкин.

Жароҳатланган борасида «Барса»да вазият ёмонроқ. Фати, Лангле, Роберто ва Умтитида турли кўринишдаги жароҳатлар мавжуд бўлса, Усмон Дембеленинг жамоага ёрдам бериши ҳам маълум эмас. Клуб интизомий чора сифатида уни таркибдан четлатганди, лекин трансфер ойнаси якунлангач, вазият ўзгарган бўлиши мумкин. Франциялик ҳужумчи Европа лигаси учун «заявка»га киритилгани ҳам, Хави ҳеч бўлмаса ёзгача ундан фойдаланиши мумкинлигини англатади. Шунингдек, Дани Алвеш шунча йиллик танаффусдан сўнг илк бор «Камп Ноу» томошабинлари олдида майдонга тушиш эҳтимоли бор. Алвеш тугаётган ҳафтада Бразилия таркибида майдонга тушгани ва қисқа муддатда қай даражада тайёр ҳолда Барселонага қайтганига ҳам боғлиқ, албатта.

«Атлетико» сафида жароҳатланганлар деярли йўқ бўлса-да, Алвеш сингари, ҳафта давомида Жанубий ва Шимолий Америкадаги миллий жамоалар ўйинларида бўлиб қайтганлар кўп. Ҳименес, Лоди, Эррера, Кунья ва Суарес шулар жумласидандир. Шунингдек, Антуан Гризманн кичик жароҳатидан тикланиб улгурмагани ва мадридликларнинг сўнгги машғулотларида қатнаша олмагани ҳақида хабарлар пайдо бўлди.

БОШҚА ЎЙИНЛАР

5 февраль. ЧЕЛСИ – Плимут (17:30), РОМА – Женоа (19:00), МАНЧЕСТЕР СИТИ – Фулҳэм (20:00), ТОТТЕНҲЭМ – Брайтон (6 февралга ўтар кечаси, 01:00).Осасуна – СЕВИЛЬЯ (6 февралга ўтар кечаси, 01:00)

6 февраль. АТАЛАНТА – Кальяри (16:30), ЛИВЕРПУЛЬ – Кардифф (17:00), Венеция – НАПОЛИ (19:00), Лилл – ПСЖ (7 февралга ўтар кечаси, 00:45), ЮВЕНТУС – Верона (7 февралга ўтар кечаси, 00:45), РЕАЛ – Гранада (7 февралга ўтар кечаси, 01:00).