Путин Украина билан қисман “ҳудуд алмашинуви”га тайёр

Россия президенти Владимир Путин ҳали ҳам Анкорижда ўтган саммитда келишиб олинган ён беришларга боришга тайёр, бу ҳақда у пайшанба куни, 25 декабрда давлат кенгаши мажлисида айтган, деб ёзади “Коммерсант” газетаси. Украинанинг “Страна.ua” нашри қайд этишича ва бошқа ОАВнинг аввалги хабарларидан ҳам кўриниб турибдики, гап Кремл 2022 йил кузида босиб олинган ҳудудларда ўтказилган “референдумлар” натижасига таяниб Россия қисми деб эълон қилган Запорижжя ва Херсон вилоятлари ҳудудларидан Украина қўшинларини олиб чиқиш талабидан воз кечиш ҳақида бормоқда.

“Коммерсант” маълумотига кўра, давлат кенгаши мажлисида Путин энг кўп АҚШ ва Украина билан урушни тўхтатиш режаси бўйича олиб борилаётган музокаралар жараёни ҳақида гапирган. Хусусан, у “Россия томонидан ҳам қисман ҳудуд алмашинуви мумкин” эканини истисно қилмаган. Бироқ Путин “Краматорск–Константиновка–Славянск (Украинанинг Донецк вилоятидаги — таҳр.) тугунининг кимга тегишлилиги масаласи муҳокама қилинмайди”, деб қўшимча қилган.

Владимир Путиннинг айтишича, ҳозир Россия ва АҚШ томонлари Запорижжя атом электр станцияси (ЗАЭС)ни биргаликда бошқариш масаласини муҳокама қилмоқда. Хусусан, гўёки АҚШ томони станцияда майнинг масаласига қизиққан, шунингдек Украинага электр энергияси етказиб беришни муҳокама қилишни бошлаган. Украина мутахассислари ЗАЭСда ишлаши мумкинми, деган саволга РФ президенти улар ҳозир ҳам у ерда эканини, “фақат энди уларнинг паспортлари Россияники”, деб жавоб берган. Шунингдек, у Европа етакчилари билан музокаралардан кейин АҚШ томони ўзининг айрим таклифларидан “четга чиққанини” айтган ва буни заифлик аломати деб атаган.

26 декабр эрталаб Украина президенти Володимир Зеленский тез орада Америка раҳбари Доналд Трамп билан учрашишини билдирди. “Бир кунни ҳам бой бермаяпмиз. Энг юқори даражада — президент Трамп билан яқин вақтда учрашув ҳақида келишиб олдик. Янги йилгача кўп нарса ҳал бўлиши мумкин”, — деб ёзган у ўзининг Telegram-каналида.

Украинанинг The Kyiv Post газетаси манбаларидан бирига кўра, ҳамма нарса режадагидек кетса, учрашув 28 декабр куни бўлиб ўтиши мумкин. Ноябр охирида Трамп Зеленский ва Путин билан фақат мамлакатлар ўртасида тинчлик келишуви “якуний” бўлган ёки “якуний босқич”га келиб қолган тақдирдагина учрашишга тайёрлигини билдирган эди.