Ироқдаги тўйда содир этилган ҳужум 30 кишининг умрига зомин бўлди

Ироқда тўйнинг нишонланиши вақтида содир этилган иккита портлаш оқибатида 30 киши ҳалок бўлди, 26 киши жароҳат олди, деб хабар бермоқда dpa ахборот агентлиги. 

Портлаш Тикрит шаҳридан шимолга томон 20 км узоқликда жойлашган Ҳажжаж қишлоғида 8 март куни юз берган. Ироқ хавфсизлик кучлари воқеа жойини ўраб олишган. Дастлабки маълумотларга кўра, портловчи моддалар икки худкуш томонидан ҳаракатга келтирилган. Маҳаллий ОАВнинг маълум қилишича, ҳужумда 4 худкуш иштирок этган.   

Ҳозирча ҳеч қайси бир гуруҳ бу ҳужум учун жавобгарликни ўз зиммасига олмаган. 

Ироқда ИШИД террорчилик гуруҳи фаолияти сабабли таранг вазият сақланиб қолмоқда. Жангарилар ҳужумлар ва терактлар содир этмоқдалар. Бу қўпорувчилик ҳаракатлари оқибатида борган сари тинч аҳоли кўпроқ жабр кўрмоқда.