Коронавирус эпидемияси ортида энг катта фойда кўрган хитойлик 10 тадбиркор

Бу миллиардерлардан ярмидан кўпи соғлиқни сақлаш соҳаси билан боғланган.  

Хитойлик тадбиркорлардан коронавирус эпидемияси ортида Hansoh Pharmaceutical фармацевтика компанияси раҳбари Чжун Хуэйцзюань энг кўп даромад олди. 6 март куни савдолар ёпилиши олдидан аёл тадбиркорнинг бойлиги бир ҳафта аввалгидан 2,2 млрд доллар ёки 16 фоизга кўпайиб, 16,6 млрд долларга баҳоланган. 59 ёшли аёл ва унинг қизи юқумли касалликлар, қанд касаллиги ва саратон касалликларидан дори воситалари ишлаб чиқарувчи компаниянинг 75 фоиз акциясига эгалик қилади. 

Чжун турмуш ўртоғи билан Хитойнинг энг бой оиласини ташкил қилади. Унинг турмуш ўртоғи Сунь Пяояннинг бойлиги ўтган ҳафта ичида 1,3 млрд долларга кўпайиб, 13,6 млрд долларгача етган. 61 ёшли тадбиркор жорий январгача 30 йил давомида Хитойнинг энг йирик фармацевтик компанияси Jiangsu Hengrui’га раҳбарлик қилиб келган. Оғриқсизлантирувчи воситалар ва антибиотиклар ишлаб чиқарувчи компания акциялари Шанҳай биржасида бир ҳафта ичида 10 фоизга ошган. 

Jiangsu Hengrui ва Hansoh Pharmaceutical акциялари қимматлашиши яна бир хитойлик тадбиркор Цэнь Цзюньда бойлигининг ҳаммадан кўпроқ - 21 фоизга, яъни 7,8 млрд долларгача ошишига имкон берди. 

Хитойнинг шифохона қурилмалари етказиб берувчи энг йирик компанияси Mindray Medical International асосчиларидан бири ва бош директори Ли Ситиннинг бойлиги 1,3 млрд долларга (11 фоиз) кўпайиб, 13,2 млрд долларга етган. Шэньчжэн шаҳрида жойлашган компания мониторинг учун қурилмалар ва қон таҳлили учун реагентлар ишлаб чиқаради. 

Mindray Medical International’нинг яна бир асосчиси Сюй Ханнинг бойлиги ҳам 1,3 млрд долларга кўпайиб, 12,8 млрд долларга етган. 53 ёшли Сюй компаниянинг директорлар кенгаши раиси ҳисобланади.

Aier Eye Hospital Group офтальмология тармоғи раиси Чен Баннинг бойлиги 6 март куни бир ҳафта ичида 1 млрд долларга (13 фоизга) кўпайиб, 9,1 млрд долларга етди. Бош қароргоҳи Хунань провинциясида жойлашган компания АҚШ, Европа ва Ҳонгконгда 80 дан кўпроқ офтальмологик клиникага эга.     

Соғлиқни сақлаш соҳаси билан боғлиқ бўлмаган яна 4 миллиардер охирги ҳафта ичида сезиларли бойиди. Жумладан, Цин Инлиннинг бойлиги 1,9 млрд долларга (10 фоиз) кўпайиб, 20,3 млрд долларга етди. 54 ёшли Цин Хитойнинг чўчқа етиштирувчи энг йирик компанияларидан бири Muyuan Foodstuff’га раҳбарлик қилади. 

New Hope Group конгломерати эгаси Лю Юнхаонинг бойлиги 1,8 млрд долларга (16 фоиз) кўпайиб, 12,7 млрд долларга етган. Конгломератнинг бўлинмаларидан бири New Hope Liuhe Хитойнинг энг йирик қишлоқ хўжалиги компанияларидан бири саналади. 

Хитойнинг энг бадавлат одамларидан бири, Tencent асосчиси ва бош директори Ма Хуатэннинг (Пони Ма каби маълум) бойлиги бир ҳафта ичида 1,1 млрд долларга кўпайиб, ҳозирда 44,5 млрд долларга баҳоланмоқда. Tencent яқинда коронавирусни аниқлаш ва унга қарши вакцина топишга қаратилган янги лойиҳаларни ишга туширди. Эпидемия вақтида Хитойнинг қанчалик кўп аҳолиси ўз уйида қолса, Tencent’нинг ўйин, мусиқа ва бошқа кўнгилочар хизматларига талаб шунчалик ошиб боради.      

Қуйида 2 мартдан 6 мартгача даврда бойлиги энг катта миқдорда ўсган хитойлик миллиардерлар ўнталиги келтирилган:

Чжун Хуэйцзюань, Hansoh Pharmaceutical, 2,2 млрд долларга бойиган

Цин Инлин ва оиласи, Muyuan Foodstuff, 1,9 млрд долларга бойиган

Лю Юнхао ва оиласи, New Hope Group, 1,8 млрд долларга бойиган

Цэнь Цзюньда, Jiangsu Hengrui, 1,4 млрдга долларга бойиган

Ли Ситин, Mindray Medical International, 1,3 млрд долларга бойиган

Сюй Хан, Mindray Medical International, 1,3 млрд долларга бойиган

Сунь Пяоян, Jiangsu Hengrui, 1,3 млрд долларга бойиган

Хэ Сянцзянь, Midea Group, 1,2 млрд долларга бойиган

Ма Хуатэн, Tencent, 1,1 млрд долларга бойиган

Чень Бан, Aier Eye Hospital Group, 1 млрд долларга бойиган.