ЮНИСЕФ: оилалардаги кам даромад болаларнинг таълим олишига тўсқинлик қилади

​Оилалардаги кам даромад — болаларнинг келажакда муносиб иш топишга имкон берадиган билим ва кўникмаларни эгаллашларига ёрдам берадиган муҳитда ўсишларига тўсқинлик қилади. ЮНИCEФ ва Жаҳон банки тадқиқотлари натижасига кўра, энг кам таъминланган оилалардаги болаларнинг мактабгача таълим муассасаларига бориш имконияти ўзига тўқ оилалардаги болаларга нисбатан 1,4 баробар камдир. Бу ҳақда ЮНИСЕФ ва  «Юксалиш» умуммиллий ҳаракати томонидан ташкил этилган тадбирда айтилади. 

1 февраль куни давлат ва нодавлат ташкилотлари, илмий-тадқиқот ва таълим муассасалари вакиллари, шунингдек, халқаро экспертлар «Ўзбекистонда болаларни ижтимоий ҳимоя қилиш тизимини ислоҳ қилишнинг долзарб вазифалари» мавзусидаги стратегик мулоқотда иштирок этишди.

«Сўнгги икки йил ичида ҳукумат бир қатор ислоҳотларни амалга оширишни бошлади. Иқтисодий ислоҳотлар кўпинча оилаларнинг заифлигини кучайтириши мумкин бўлган хавфлар билан боғлиқ бўлади. Шунинг учун кучли ижтимоий ҳимоя тизими давом этаётган ислоҳотларнинг муҳим таркибий қисми бўлиши керак», — деди ЮНИCEФнинг Ўзбекистондаги ваколатхонаси раҳбари Саша Грауманн.

Тадбир иштирокчилари Ўзбекистонда болаларнинг ижтимоий ҳимоясини кучайтириш бўйича турли тавсияларни кўриб чиқдилар. ЮНИCEФ мавжуд сиёсатни ислоҳ қилиш вариантини таклиф қилди. Мазкур тавсияларнинг бажарилиши 2030 йилга бориб болалар нафақалари таъсирида умумий кам таъминланганлик даражасини 8 фоиздан 21 фоизгача камайтириши, шунингдек 2034 йилга бориб 18 ёшгача бўлган болаларни нафақалар билан қамраб олиш миқёсини қадамба-қадам камида 75 фоизга етказиш имконини бериши мумкин.