Олимпиаданинг 11-куни. Кубалик афсонавий гигант тарихий натижа кўрсатди ва кетди, Иман финалда

6 август куни Париждаги Олимпия ўйинларида спортнинг саккиз турида 15 та медаллар шодаси ўйналди.

Ўйинларнинг иккинчи ҳафтасида энг машҳур спорт турларида — жамоавий ўйинларда медаллар ўйналмоқда.

Енгил атлетика бўйича мусобақаларда бешта медал ўйналди.

Париж олимпиадасида аср воқеаси

Олимпиада. Юнон-рим кураши. -130 кг вазн тоифасида финал
Михаин Лопес Нунес (Куба) — Ясмани Акоста Фернандес (Чили) — 6:0

6 август куни Парижда юнон-рим кураши бўйича баҳслар якунланди. 130 килограммгача бўлган вазн тоифаси финалида кубалик афсонавий Михаин чилилик Ясмани Акостани мағлуб этган ҳолда фаолиятидаги бешинчи Олимпия медалини қўлга киритди.

Дастлаб 2004 йилги Афина олимпиадасида қатнашган Лопес чоракфиналда россиялик Хасан Бароевга ютқазиб, иштирокини тўхтатганди, Пекин-2008 дан бошлаб кейинги бешта олимпиаданинг ҳар бирида энг яхши бўлди. У Хитойдаги ўйинлар финалида литвалик Миндаугас Мизгайтисдан устун келган, тўрт йил ўтиб Лондонда эстониялик Хейки Набини мағлуб этган, 2016 йилда эса туркиялик Ризо Кайалпни енгган, 2021 йилги финалда гуржистонлик курашчи Якоб Каджая устидан ғалабага эришган.

У Токиодаги чемпионликдан кейиноқ Александр Карелиннинг рекордини янгилаган ҳолда тарихдаги энг совриндор курашчига айланганди. Россиялик курашчи фаолияти давомида олимпия ўйинларининг учта олтинини қўлга киритганди (Сиднейдаги охирги иштирокида кумуш билан кифояланган), Лопес эса тўртта. Шу билан бирга, олимпия ўйинларида шоҳсупага чиқиш борасида икки курашчининг натижаси тенглашганди (тўрттадан), Парижда эса Михаин бу борада ҳам устунликка эришди.

Бошқа спорт турларида олти, етти ва ундан кўп олтин медалларга эга чиққан спортчилар ҳам бор, лекин барибир фақат Лопеснинг бешта олтин медалини афсонавий деб ҳисоблаш мумкин.

Чунки курашчилар гимнастикачилар, сузувчилар, теннисчилар ёки эшкак эшувчилардан фарқли ўлароқ тўрт йилда фақат битта олтин қўлга киритиш имконига эга бўлади. Кубалик спортчи эса бу имкониятдан барчадан яхшироқ фойдаланган. Охирги ўйин йил мобайнида у Олимпиада ўйинларида бирор марта мағлуб бўлмаган.

Парижда у биринчи раундда жанубий кореялик Ли Сун Чан тўсиғидан ўтди (7:0), чоракфиналда эронлик Амин Мирзазода унга қаттиқ қаршилик кўрсатди (3:1), яримфиналда эса озарбойжонлик Сабоҳ Шариатий таслим этилди (4:1). Унинг финалдаги рақиби Ясмани Акоста туркиялик Ҳамза Бакир (3:1), мисрлик Абдуллатиф Муҳаммад (2:1) ва хитойлик Мена Линг Же (1:1, охирги ҳаракат учун ғалаба)ни мағлубиятга учратганди. 

Финалда бир неча ҳафтадан кейин 42 ёшни қаршилайдиган Лопес чилилик рақибга ҳеч қандай имконият қолдирмади. У дастлабки уч дақиқаликдан кейин ҳам 3:0 ҳисобида олдинда бораётганди. Иккинчи бўлимда ҳам бир неча ҳаракат амалга оширган Михаин ишончли ғалабани расмийлаштирди — 6:0. Лопес олтин медални қўлга киритди ва Олимпия ўйинлари тарихида индивидуал мусобақалар доирасида шу қадар кўп олий совринни қўлга киритган илк атлет бўлди.

Шундан кейин Лопес гиламнинг ўзида оёқ кийимини ечди ва бу билан фаолиятини якунлаганини билдирди.

Олимпиаданинг энг можароли иштирокчиси — финалда

Олимпия ўйинлари. Аёллар. -66 кг вазн тоифасида 1/2 яримфинал
Жанжаем Суваннапхенг (Таиланд) — Иман Ҳелиф (Жазоир) — 0:5

6 август куни Парижда бокс турнири давом эттирилди. Қанчалик ғалати кўринмасин, мухлисларнинг асосий эътибори аёллар ўртасида 66 килограммгача вазн тоифасидаги яримфинал баҳсига қаратилди.

Жазоирлик Иман Ҳелиф, бу Олимпиадада шов-шув кўтарган боксчи қиз барчанинг диққат марказида турибди. XY-хромосомалар аниқланиб, текширувдан ўта олмагани баҳонасида ўтган йилги жаҳон чемпионатидан четлатилган боксчига Париждаги ўйинларда иштирок этишга рухсат берилди ва у ўз вазн тоифасида асосий фаворитга айланди. Жазоирлик қиз ўз атрофидаги кучли шовқинга қарамай, ҳар бир босқичдаги рақибларни ишончли тарзда мағлубиятга учратмоқда. 1/8 финалда Иман италиялик Анжела Карини тўсиғидан ўтганди, ушбу спортчи 46 сония ичида бир неча зарбалар ўтказиб юборгач, жангни давом эттиришдан бош тортган ва бу рақиб мусобақага қўйилишига эътироз билдирганди. Кейинроқ у бу ҳаракати учун Имандан узр сўраб чиқди. Иман эса кейинги босқичда венгриялик Анна Ҳаморини мағлубиятга учратди.

Яримфиналда Ҳелиф Таиланд вакили Жанжаем Суваннапхенгга қарши рингга чиқди. Улар аввалроқ жаҳон чемпионатида ҳам тўқнаш келишган ва ўшанда Иман ҳакамлар қарорига кўра ғолиб деб топилганди.

Биринчи раунд африкалик спортчининг тўлиқ устунлигида ўтди, у ринг марказини эгаллади ва жангни назорат қилди. Суваннапхенг бунга тезлиги билан қарши туришга ҳаракат қилди, аммо қарши зарбалар билан кутиб олинди. Дастлабки уч дақиқалик сўнгида рақиблар клинчга кириб олишди. Раунд якунига кўра барча арбитрлар Ҳелифнинг устунлигини қайд этишди. Жангнинг қолган қисми ҳам шу руҳда ўтди. Таиланд вакили таслим бўлишни истамади ва ҳужум қилиш учун имкон қидирди, аммо рақибининг янада кўпроқ зарбаларини ўтказиб юбора бошлади ва бир марта нокдаунга ҳам учради, якунда жазоирлик спортчи яққол ғалабага эришди. Таиландлик боксчи Ҳелифнинг олдинги рақибларидан фарқли ўлароқ унинг қўлини сиқиб қўйиб, ғалаба билан табриклади.

Энди Ҳелиф эски таниши Ян Люга қарши олтин учун жанг қилади — у яримфиналда тайванлик Чен Нянциндан устун келган. Хитойлик спортчи амалдаги жаҳон чемпиони ҳисобланади ва Хелиф учун жиддий рақиб сифатида кўрилмоқда.

Баскетбол: мезбонлар ва америкаликлар — яримфиналда

Эркаклар ўртасида баскетбол турнирида сешанба куни чоракфиналлар ўтказилди — яъни медаллар учун курашадиган жамоалар аниқланди.

Куннинг биринчи ярмида Сербия қўшимча вақтларда беш очко фарқи билан Австралияни мағлуб этди, Германия эса Греция билан баҳсда ишончлироқ натижага — 13 очко — эришди.

Кейин, кечқурун, Франция Канадани 82:73 ҳисобида,  баскетбол бўйича барча олимпия турнирлари фаворити ҳисобланган АҚШ Бразилияни йирик ҳисобда тор-мор этди — 122:87.

Яримфиналлар 8 август куни, финал ва учинчи ўринлар учун баҳслар эса — 10 август кунига белгиланган.

Футбол. АҚШ ва Бразилия — финалда

Аёллар ўртасидаги футбол турнирида биринчи яримфиналда сешанба куни АҚШ ва Германия тўқнашди.

Америкаликлар 1:0 ҳисобида устун келишди ва финалда бразиллар билан учрашадиган бўлди, жанубий америкаликлар шу куни испаниялик қизлардан 2:0 ҳисобида устун келишди.

АҚШ ва Бразилия азалдан дунёнинг энг кучли икки жамоаси ҳисобланган, фақат ҳозирда рейтингда Испания, Франция ва Англияни олдинга ўтказиб юборган.

Аёллар ўртасидаги футбол финали 10 август куни ўтказилади, бир кун олдинроқ Германия ва Испания жамоалари бронза учун майдонга тушади.

Волейбол: бу ерда ҳам — АҚШ ва Бразилия. Аммо ҳозирча яримфиналда

Бразилия ва АҚШ нафақат футболда, балки спортнинг бошқа кўплаб жамоавий турларида, хусусан, аёллар волейболида азалий рақиблар саналади.

Парижда аёллар волейболи турнирида сешанба оқшомида яримфиналга шу икки жамоа, шунингдек Италия ва Туркия жамоалари ўтишди.

Пайшанба куни яримфиналда АҚШ Бразилия билан, Италия эса Туркия билан ўйнайди, олтин учун баҳс Олимпиаданинг сўнгги кунида, 11 август куни ўтказилади.

Бир кун олдин эркаклар ўртасидаги волейбол турнирида чоракфинал баҳслари ўтказилган ва 8 август куни бўлиб ўтадиган яримфинал босқичига Полша (жаҳон рейтинги пешқадами), АҚШ, Италия ва Франция чиққанди.

Сёрфинг: Париждан 16 минг километр узоқда

Олимпиадалар тарихида илк бор спорт турларидан бири бўйича мусобақалар Ўйинларнинг асосий шаҳридан шу қадар узоқда — қарийб 16 минг километр масофада ўтказилмоқда. Сёрфинг бўйича турнир Тинч океанида, Таитида ўтказилди.

Сешанба куни бу ерда мезбон спортчи ғолиб бўлди: Каули Вааст — ҳам Франция жамоаси аъзоси, ҳам маҳаллий аҳоли вакили саналади. Финалда у австралиялик Жек Робинсондан устун келди.

Аёл сёрфингчилар ўртасидаги баҳсларда эса америкалик Кэролайн Марксга тенг келадигани топилмади.

Хитойлик спортчилар биринчи ўрин учун курашда америкаликлар билан рақобатни давом эттирмоқда. 6 август куни Америка жамоаси тўртта олтин, бир кумуш ва уч бронза қўлга киритиб, яққол пешқадамга айланди (24 – 31 – 31), Хитой битта олтин, 3 та кумуш ва 2 та бронза билан кифояланди (22–21–16). Кейинги ўринларда Австралия (14), Франция (13) ва Буюк Британия (12 та олтин медал) бормоқда.

Америкаликлар аёллар сёрфингида, аёллар курашида биттадан, енгил атлетикада иккита олтин олди, бунга хитойликлар сувга сакрашдаги битта чемпионлик билан жавоб қайтарди, 10 метрлик трамплиндан сакрашда хитойлик Цюан Хунчан ва Чен Юси кутилганидек биринчи ва иккинчи бўлишди.

Учинчи ўринни шимолий кореялик Ким Ми Рэ эгаллади. КХДРнинг медаллари сони бештага етди: икки кумуш ва учта бронза.