Ўзбекистон Украинадаги фуқароларига Киев–Тошкент рейси мунтазам амалга оширилаётганини эслатди

Мурожаатда элчихона “тасдиқланмаган, сохта маълумотларни тарқатмасликни ва ваҳима қўзғамасликни” сўраган.

“Элчихона Украина давлат органлари, дипломатик корпус ва юртдошларимиз билан доимий алоқада”, дейилади мурожаатда.

Дипломатик ваколатхона, шунингдек, Uzbekistan Airways миллий авиакомпанияси Киевга мунтазам рейслар амалга ошираётгани ва манфаатдор фуқаролар Киев–Тошкент йўналиши бўйича Ўзбекистонга қайтишлари мумкинлигини маълум қилган.

• Эслатиб ўтамиз, 11 февраль куни кечқурун АҚШ президенти Жо Байден маъмурияти Россия Украинага «исталган» лаҳзада бостириб кириши мумкинлигини маълум қилди. АҚШ Давлат котиби Энтони Блинкен бу ҳужум Пекиндаги қишки Олимпия ўйинлари якунланмасдан бошланиши ҳам мумкинлиги, ҳужумнинг тахминий санаси сифатида 16 февраль куни кўрилаётганини айтган.
• АҚШ Давлат департаменти америкаликларга Украинадан яқин 24-48 соат ичида, тижорий авиақатновлар бўлиб турган вақтда чиқиб кетишни тавсия этган, президент маслаҳатчиси Жейк Салливан Россия томонидан босқин рўй берса, Украинада фуқаролик рейслари амалга оширилиши тўхташи мумкинлигини айтган. АҚШдан ташқари 30дан ортиқ давлатлар ўз фуқароларини Украинага бормай туриш ва у ерда бўлиб турганларни мамлакатни зудлик билан тарк этишга чақирган.
• Ғарб мамлакатлари ўз дипломатларининг бир қисмини Украинадан эвакуация қилмоқда ёки элчихоналарини Киевдан Львовга кўчирмоқда.