Зеленский ва Трамп Канадада учрашади

АҚШ президенти Доналд Трамп Канаданинг Алберта провинциясида «Катта еттилик» саммити доирасида Украина президенти Володимир Зеленский билан учрашув ўтказади. Бу ҳақда Оқ уйда расман маълум қилинди.

Саммит бир кун аввал бошланган ва 17 июнгача давом этади. Тадбирга меҳмон сифатида таклиф этилган Зеленский сешанба куни Канадага етиб бориши кутилмоқда.

2025 йил бошидан буён Трамп ва Зеленский икки марта учрашганди. Уларнинг биринчи учрашуви Оқ уйда 28 феврал куни, Зеленский ер ости бойликлари бўйича келишувни имзолаш учун келганида бўлиб ўтган. Аммо президентлар учрашувининг бошидаёқ журналистлар кўз ўнгида оғзаки тортишув бўлиб ўтди, шундан сўнг Зеленский Вашингтонни тарк этди, келишув имзоланмай қолди, Трамп эса бир неча кунга Украинага ҳарбий ва разведка ёрдамини тўхтатиб қўйди.

Трамп ва Зеленскийнинг иккинчи учрашуви 26 апрел куни Ватиканда Рим папаси Францискнинг дафн маросими доирасида бўлиб ўтди. Бу учрашув нисбатан муваффақиятли кечди, ОАВ Украина президенти Трампни Россияга нисбатан қатъийроқ позицияни эгаллашга кўндиришга муваффақ бўлгани ҳақида ёзди. Шундан сўнг Трамп ҳақиқатан ҳам Москванинг хатти-ҳаракатларини омма олдида тез-тез танқид қила бошлади.

Трамп Россия президенти Владимир Путин билан Оқ уйга қайтганидан бери бирор марта ҳам учрашмаган – аммо улар беш марта телефон орқали гаплашган, охирги марта бу 14 июн куни содир бўлганди. Ўшанда биринчи марта суҳбатнинг асосий мавзуси Россия-Украина уруши эмас, балки Исроилнинг Эронга ҳужуми бўлди.

Зеленский сўнгги ойларда давом этаётган уруш фонида АҚШ ва Россия ўртасидаги муносабатлар яхшиланаётганидан норозилигини бир неча бор билдирганди. 12 июн куни Украина президенти АҚШ Давлат департаменти россияликларга Россия куни муносабати билан йўллаган расмий табрикни «нохуш факт» деб атади. У «руслар Украинадан мустақилликни тортиб олишни истаётганини ва ҳамкор давлат – Қўшма Штатлар уларни [Россия мустақиллиги] куни билан табриклаётганини ижобий қабул қила олмаслиги»ни қайд этди.

Американинг Newsmax телеканалига берган ва 14 июн куни эълон қилинган интервюсида Зеленский Москва ва Вашингтон ўртасидаги мулоқотни «жуда илиқ суҳбат» деб таърифлади ва «Путин урушни тугатишни истамайди ва охир-оқибат Трампни алдайди», деган фикрни билдирди.