Qoʻshimcha funksionallar
-
Tungi ko‘rinish
Husiylar Hind okeanidagi kemalarga hujum qilish rejalarini e’lon qildi
Husiylar endi Afrika janubidagi Hind okeani va Yaxshi Umid burni orqali harakatlanayotgan kemalarga hujum qilish niyatida.
Foto: Getty Images
Yaman husiylarining «Ansorulloh» harakati Isroilga aloqador kemalarga qarshi harbiy amaliyotlar ko‘lamini kengaytirayotganini e’lon qildi.
Harakat matbuot kotibi Yahyo Sariya so‘zlariga ko‘ra, husiylar endi Afrika janubidagi Hind okeani va Yaxshi Umid burni orqali harakatlanayotgan kemalarga hujum qilish niyatida. Hutiylar allaqachon bir nechta dengiz raketalari va dronlari yordamida Hind okeanida Isroil va Amerikaning uchta kemasiga hujum qilgan.
«Yaman qurolli kuchlari Isroil kemalariga, shuningdek, Isroil bilan bog‘liq yoki Falastin portlariga yo‘l olgan kemalarga qarshi o‘z operatsiyalari ko‘lamini kengaytirib, ularni Hind okeani va Yaxshi Umid burni orqali ta’qib qilishni boshladi. Yaman qurolli kuchlari Qizil dengiz va Arab dengizi hamda Hind okeanida Isroil kemalariga to‘sqinlik qilishdan to‘xtamaydi», dedi Yahyo Sariya husiylarga tegishli Al-Masirah telekanali efirida.
Yaman husiylari 2023 yil noyabr oyida AQSh va Britaniya kemalariga, shuningdek, Isroil bilan bog‘liq kemalarga hujum qila boshladi. Ular o‘z harakatlarini Isroil bilan urushda HAMAS jangarilarini qo‘llab-quvvatlashi bilan izohlagan. 2024 yil yanvar oyida Buyuk Britaniya va AQSh xalqaro koalitsiya ko‘magida Yamandagi husiy nishonlariga zarba berishni boshlagan edi.
