OAV: «Oreshnik» uchirilgandan so‘ng Gerasimov AQShga qo‘ng‘iroq qilgan

27 noyabr kuni Rossiya Qurolli kuchlari Bosh shtabi boshlig‘i Valeriy Gerasimov AQSh Qurolli kuchlari shtab boshliqlari qo‘mitasi (ShBQ) raisi Charlz Braunga qo‘ng‘iroq qildi. Bu haqda 4 dekabr, chorshanba kuni Reuters va The New York Times (NYT) xabar qildi.

Suhbat Rossiyaning «Oreshnik» o‘rta masofaga mo‘ljallangan ballistik raketasi Dniproga hujum uyushtirganidan atigi olti kun o‘tib bo‘lib o‘tdi.

Gerasimov va Braun «bir qator global va mintaqaviy xavfsizlik masalalari, jumladan, Ukrainada davom etayotgan mojaroni muhokama qilishdi», dedi ShBQ rahbari vakili Jyeril Dorsi.

Braun Gerasimov bilan birinchi marta gaplashdi

«General Gerasimovning iltimosiga ko‘ra, general Braun bu qo‘ng‘iroq haqida ommaga ma’lumot bermaslikka rozi bo‘ldi», deb qo‘shimcha qildi Dorsi. Gerasimov nega suhbatni e’lon qilmaslikni so‘ragani noma’lum.

Rasmiylarga ko‘ra, suhbat chog‘ida Gerasimov Amerika tomoniga «Oreshnik»ning uchirilishi Jo Bayden ma’muriyati Ukrainaga Rossiya hududiga chuqur zarba berish uchun ATACMS ballistik-taktik raketalaridan foydalanishga rozi bo‘lishidan ancha oldin rejalashtirilganini aytgan.

Reuters xabariga ko‘ra, Braun rossiyalik hamkasbi bilan ilk bor bu formatda muloqot qilgan. Bungacha Gerasimov undan avvalgi harbiy rahbari Mark Milli bilan gaplashgan.

Putin: Rossiya jangda «Oreshnik» raketasini sinovdan o‘tkazishda davom etadi

Rossiya prezidenti Vladimir Putin Rossiyaning yangi «Oreshnik» raketasi sinovlarini «muvaffaqiyatli» deb atadi. «Aytganimizdek, vaziyat va Rossiya uchun yaratilayotgan xavfsizlik tahdidlarining xususiyatiga qarab, biz ushbu sinovlarni, shu jumladan jangovar sharoitlarda ham davom ettiramiz», dedi u 22 noyabr kuni Rossiya Mudofaa vazirligi va Rossiya mudofaa sanoati rahbariyati bilan uchrashuvda.

Bundan tashqari, Putin «Oreshnik» raketasi Rossiya Qurolli kuchlarida foydalanishga qabul qilingani va uni seriyali ishlab chiqarish boshlanganini e’lon qildi.

SRQ qo‘mondoni: «Oreshnik» raketasi butun Yevropadagi nishonlarni urishga qodir

O‘z navbatida, Rossiya Strategik raketa qo‘shinlari (SRQ) qo‘mondoni Sergey Karakayev Putin bilan uchrashuvda «Oreshnik» butun Yevropa bo‘ylab nishonlarga zarba bera olishini aytdi, bu «uni uzoq masofaga mo‘ljallangan aniq qurollarning boshqa turlaridan ajratib turadi».

Karakayevning ta’kidlashicha, «Oreshnik» raketa tizimini ishlab chiqish «strategik raketa qo‘shinlarining har xil turdagi nishonlarni, ham yadroviy bo‘lmagan, ham yadroviy qurollarda belgilangan vazifaga muvofiq urish uchun jangovar imkoniyatlarini kengaytiradi».