Ижтимоий тармоқда Тошкентнинг баъзи туманларида газ босими камайгани муҳокама қилинди

Ўтган дам олиш кунлари (17-18 октябрь) Ўзбекистонда кузатилган ёғингарчиликлар ҳамда ҳаво ҳароратининг пасайиши табиий газ босимининг ҳам пасайишига таъсир этди.

Uz24.uz нашрида хабар қилинишича, шу туфайли Тошкент шаҳрининг кўпгина туманларида газ босими камайган. Фейсбукдаги “Жамоатчилик назорати” гуруҳи иштирокчилари бу масалани муҳокама қилишган.

Фойдаланувчилардан бири “Чилонзор туманида, аниқроғи Дўмбирободда газ босими кам, яна кимда қанақа?”, дея савол қолдирган ва далил сифатида суратларни жойлаган. Унга жавобан бошқа иштирокчилар Учтепа тумани 11- кварталда, Юнусобод тумани Ибн Сино массиви ҳамда 4- кварталда, шунингдек, Яккасарой, Миробод, Чилонзор туманларида ҳам газ босими пастлигини изоҳларда ёзиб қолдиришган.

Ижтимоий тармоқ фойдаланувчиларининг аксарияти ҳар йили совуқ тушиши билан бу ҳолат такрорланишини айтишган.